Три деца загинаа во воздушни напади во Јемен, Хутите ја обвинија Саудиска Арабија

Најмалку три деца загинале, а 10 лица биле повредени во воздушни напади врз југозападната јеменска покраина Дамар, соопштило Министерството за здравство под контрола на Хутите.

— реклама —

Бунтовничката група, која има поддршка од Иран, ја обвини Саудиска Арабија дека стои зад нападите, пренесува АП. Засега нема коментар од саудиските власти во врска со обвинувањата.

— реклама —

Според соопштението на министерството, во вчерашните напади биле погодени куќи во селото Ал-Ар, во областа Давран Анес. Животот го загубиле едно осумгодишно момче и две деца на возраст од 10 години, додека повеќе од 10 лица биле повредени.

— реклама —

Според податоците на Министерството за здравство под контрола на Хутите, од обновувањето на судирите во септември, на териториите под нивна контрола загинале 124 лица.

Конфликтот во Јемен трае од 2015 година, кога Саудиска Арабија започна воена интервенција на страната на меѓународно признатата влада, со цел да ја врати нејзината власт во главниот град Сана, кој претходно го презедоа јеменските бунтовници Хути.