СДСМ прашува дали премиерот Христијан Мицкоски и министерот за правда Игор Филков конечно ги испратиле документите за екстрадиција на поранешниот премиер Никола Груевски од Унгарија.
Од опозициската партија велат дека повеќе од еден месец јавно прашуваат зошто документите сè уште не се испратени, но, како што наведуваат, не добиле одговор.
„Поминаа две недели откако Петер Маѓар е веќе нов премиер на Унгарија. Што се случува со документите? Кога ќе бидат испратени?“, прашуваат од СДСМ.
Според нив, јавноста заслужува одговор дали македонските власти ги презеле потребните чекори за екстрадиција на Груевски.
„Зошто се бега од толку едноставно прашање на кое граѓаните со месеци не добиваат одговор за најпознатиот македонски криминалец?“, наведуваат од партијата.
СДСМ обвинува дека причината за молкот е политичка.
„Можеби затоа што Мицкоски не го сака враќањето на Груевски, затоа што знае дека тоа директно би ја загрозило неговата позиција во ВМРО-ОКГ“, велат од СДСМ.
Од партијата додаваат дека Мицкоски ги тргнал сите потпретседатели од партијата и дека од општинските комитети направил „личен фан-клуб“, поради страв од враќањето на неговиот „ментор“.
„Очигледно станува збор за свесна и намерна заштита на Никола Груевски, човекот кој стана симбол на криминалот, корупцијата и заробената држава“, стои во реакцијата на СДСМ.
