„И што сега, Мицкоски?“: СДСМ прашува зошто премиерот е незадоволен од пораките на Фон дер Лајен

СДСМ со нова остра реакција кон премиерот Христијан Мицкоски по посетата на претседателката на Европската комисија Урсула фон дер Лајен на Скопје, прашувајќи го од што точно е незадоволен откако од Брисел повторно беше испратена порака дека Македонија во Европската Унија ќе влезе со својот идентитет и јазик.

„И што сега, Мицкоски? Незадоволен си што идентитетот е зачуван?“, прашуваат од опозициската партија.

Оттаму потсетуваат дека Мицкоски средбата со Фон дер Лајен ја оцени како клучна, но потоа изјави дека не е задоволен од пораките што ги добил во однос на уставните измени.

„Фон дер Лајен кажа јасно: на маса стои промената на Уставот. И нагласи: Европа ве чека со вашиот идентитет и со вашиот јазик. Тоа е истата реченица што Мицкоски ја продаваше како предавство“, велат од СДСМ.

— реклама —

Од партијата го обвинуваат Мицкоски дека пред доаѓањето на власт имал поинаква реторика во однос на Преспанскиот договор и прашањето за името.

„Никогаш Северна. Укинување на Преспанскиот договор. Враќање на името. Па Преспанскиот договор стана ремек-дело. Силјановска рече: македонскиот јазик, култура, идентитет се заштитени со договорот од Преспа. Сега тоа, во лице, го кажува и претседателката на Европската комисија. А тој е незадоволен“, се наведува во реакцијата.

СДСМ тврди дека незадоволството на премиерот не произлегува од прашањето за македонскиот идентитет, туку од тоа што условите за продолжување на евроинтегративниот процес остануваат на маса.

„Незадоволен е затоа што му ја одзедоа лагата. Не затоа што некој го чепка македонскиот идентитет“, велат од партијата.

Во реакцијата се посочува дека за продолжување на европскиот пат остануваат уставните измени, реформите и прашањата поврзани со владеењето на правото и обвинителството.

— реклама —

„Затоа што чекорот остана ист: Основи, реформи, обвинителство. Лаура Ковеши пред членство. Мицкоски тоа не го сака. Затоа ‘разговараме, не преговараме’. Затоа вината пак ја насочува кај претходните“, обвинува СДСМ.

Од опозициската партија го потсетуваат Мицкоски и на неговите најави дека ќе обезбеди подобри услови за продолжување на преговорите со Европската Унија.

„Две и пол години ветуваше подобри услови. Никаде ги нема. Нема гаранции. Нема нова рамка“, велат од СДСМ.

Според партијата, пораките што Фон дер Лајен ги испрати од Скопје се исти со оние на кои СДСМ укажувал пред изборите.

— реклама —

„СДСМ го зборуваше ова пред изборите. Сега му го кажа и Фон дер Лајен во лице. Нема повеќе лаги дека тој нешто чува, затоа што претходната влада веќе го зачува“, се наведува во реакцијата.

Во продолжение СДСМ користи и остри квалификации на адреса на премиерот, нарекувајќи го „арамија“ и обвинувајќи го дека токму тој го загрозува националниот интерес преку блокирањето на европскиот пат.

„Единствениот што го загрозува националниот интерес е токму тој – арамијата Мицкоски. Затоа што национален интерес на Македонија е членство во ЕУ“, велат од партијата.

СДСМ го обвинува премиерот и дека личниот политички интерес го става пред европската интеграција на државата.

„Нема повеќе предавници. Затоа што тој е единствениот предавник на интересот на граѓаните, заради личен интерес“, се наведува во реакцијата.

— реклама —

Од партијата прашуваат и дали следниот чекор на Мицкоски ќе бидат предвремени избори.

„И што ќе прави сега Мицкоски? Избори? За да избега од следниот чекор? Некој од Спутниците да му фрли ракавица? Да го предизвика, па повторно нови ветувања? Нови лаги?“, прашуваат од СДСМ.

Реакцијата завршува со порака дека, според СДСМ, по посетата на Фон дер Лајен повеќе нема простор за тврдењата дека продолжувањето на европскиот пат го загрозува македонскиот идентитет.

„Вистината дојде. Правдата наскоро. Власта повторно ќе биде во рацете на граѓаните. Арамија е незадоволен од вистината. Народот е незадоволен од бандата. Правдата мора да биде задоволена“, порачуваат од СДСМ.