Илјадници граѓани во акција за почисто Скопје, градот добива и нови контејнери

Илјадници граѓани се вклучиле во големата еко-акција за чистење на Скопје, која, според градоначалникот Орце Ѓорѓиевски, покажала дека грижата за градот може да ги обедини луѓето без оглед на нивните политички разлики.

Ѓорѓиевски им се заблагодари на сите учесници, меѓу кои биле неговите колеги градоначалници, младите, волонтерите и советниците од опозицијата. Тој нагласи дека чистиот и уреден град се создаваат со труд, одговорност и заедничка посветеност.

— реклама —

Според него, секој исчистен дел од градот значи подобри услови за живот, побезбедни простори за детска игра и поуредени населби. Тој посочи дека децата заслужуваат зелени површини, чисти паркови и средина во која ќе растат, а возрасните треба да бидат пример за одговорно однесување и грижа за заедничкиот простор.

Градоначалникот упати порака и до граѓаните кои несовесно фрлаат отпад, повикувајќи ги да го почитуваат трудот на сограѓаните кои одвојуваат време и вложуваат напор за градот да биде почист.

— реклама —

Тој најави дека еко-акциите ќе продолжат да се организираат двапати месечно, со цел грижата за животната средина да стане трајна навика и дел од секојдневието на скопјани. Притоа, ги повика граѓаните да почнат од сопствениот праг, улицата и парковите што ги посетуваат со своите деца, како и со личен пример да поттикнат и други да се вклучат.

— реклама —

Во меѓувреме, во употреба е пуштена нова механизација, а низ Скопје започнало и поставувањето на новите 3.300 контејнери. Со овие активности, според Ѓорѓиевски, се зајакнуваат капацитетите за побрзо и поефикасно собирање и превезување на отпадот, со цел почисти улици и поуредени населби.

„За нашето Скопје. За нашите деца. За град со кој ќе се гордееме!“, порача Ѓорѓиевски, најавувајќи продолжување на акциите за почист град.