Илјадници Мексиканци протестираа поради загадената вода за пиење

Илјадници граѓани излегоа на протест во Гвадалахара, еден од најголемите градови во Мексико, незадоволни од загадената вода што тече од нивните чешми. Демонстрантите се собраа пред резиденцијата на гувернерот, а според локалните медиуми, дошло и до судири со полицијата.

— реклама —

Жителите на некои населби со месеци се жалат дека водата е нечиста, има жолта боја и непријатен мирис. Гувернерот на сојузната држава Халиско, Пабло Лемус, соопшти дека надлежните работат на решавање на проблемот и дека досега добиле илјадници пријави од граѓаните.

— реклама —

„Го разбирам вашето незадоволство, ги слушам вашите барања и имате целосно право да го искажете своето мислење“, порача Лемус на социјалните мрежи.

Минатата недела надлежните служби го прекинаа снабдувањето со вода од блиското езеро Лас Пинтас, кое е еден од изворите за водоснабдување на градот. Според официјалните информации, водата била загадена со отпадни води по обилните дождови.

— реклама —

Сепак, демонстрантите тврдат дека проблемот трае со месеци и дека започнал многу пред последните обилни врнежи.

Гвадалахара, која претходно оваа година беше еден од градовите домаќини на Светското фудбалско првенство, сега се соочува со незадоволство на граѓаните поради квалитетот на водата за пиење.