МЕКСИКО

Двајца припадници на ЦИА загинаа во Мексико: претседателката бара објаснување

Претседателката на Мексико, Клаудија Шејнбаум нареди истрага за улогата на двајца американски службеници кои загинале во сообраќајна несреќа во северната држава Чивава. Тие загинале заедно со двајца мексикански службеници кога нивното возило излетало во провалија при враќање од операција за уништување тајна лабораторија за метамфетамин, соопштија завчера државните власти на Чивава, пишува BBC.Шејнбаум изјави дека ниту таа, ниту високи членови на федералниот безбедносен тим не биле информирани за какви било заеднички американско-мексикански операции. Мексиканската лидерка нагласи дека странски службеници можат да дејствуваат на мексиканска територија само со претходно одобрение на федерално ниво.Шејнбаум е под притисок од својот американски колега Доналд Трамп да ги засили напорите за запирање на протокот на дрога од Мексико кон САД, но инсистира дека мексиканскиот суверенитет не смее да биде загрозен.„Не знаевме за никаква директна соработка помеѓу државата Чивава и персоналот на американската амбасада“, изјави претседателката. Таа додаде дека владата мора да „ги разјасни околностите под кои тоа се случило, а потоа да ги процени правните последици“.Шејнбаум потврди дека нејзината влада побарала информации и од американската амбасада и од властите на Чивава за да утврди дали операцијата го прекршила мексиканскиот закон за национална безбедност, кој не дозволува заеднички операции без претходно федерално одобрение.Таа нагласи дека, иако нејзината влада соработува со САД и разменува разузнавачки информации, „нема заеднички операции ниту на копно ниту во воздух“. Според државен службеник од Чивава, двајца американски државјани и двајца членови на Државната истражна агенција на Чивава (AEI) загинале завчера наутро кога возилото во кое патувале излетало од патот и паднало во провалија, по што експлодирало.Американскиот амбасадор во Мексико, Роналд Џонсон, ги опишал двајцата американски државјани како „персонал на американската амбасада“. Од друга страна, главниот државен обвинител на Чивава, Сезар Хауреги, дал спротивставени изјави.На прес-конференција изјавил дека Американците биле „инструктори“ од американската амбасада кои учествувале во „обука како дел од општа и вообичаена размена со американските власти“, и дека несреќата се случила при враќање од операција за уништување лабораторија.Но, подоцна изјавил дека биле ангажирани во „основна обука, околу осум до девет часа возење од местото на операцијата против лабораторијата за дрога“. Вашингтон Пост денес објави дека двајцата загинати американски службеници работеле за ЦИА.

Свет | пред 4 часа

(Видео) Рудар спасен по 14 дена заробен под земја во Мексико

Рудар е спасен откако поминал 14 дена заробен под земја во поплавен рудник за злато и сребро во Мексико, додека двајца негови колеги го загубиле животот. Властите соопштија дека до работникот стигнале воени нуркачи и спасувачки екипи по испумпување на водата од окното на рудникот „Санта Фе“, кој се урнал на 25 март, објави Euronews.Спасувачките служби успеале да стигнат до Франциско Запата Најера по расчистување на поплавените галерии. Претседателката Клаудија Шеинбаум го оцени неговото спасување како „неверојатно“. Потврдено е дека другите двајца рудари се пронајдени мртви, додека еден од четворицата заробени работници бил извлечен претходно.Според првичните информации, до уривањето дошло поради структурен дефект во рудникот, што предизвикало поплава и ги заробило четворицата мажи, додека 21 рудар успеал да се спаси. Спасувачките тимови, со поддршка на војската и технички експерти, две недели непрекинато ја испумпувале водата.Преживеаниот, веднаш по извлекувањето, со хеликоптер бил пренесен на специјалистичка нега во болница во Мазатлан.Овој случај повторно ја отвори дебатата за безбедноста во рударството во Мексико, индустрија во која несреќите со смртни последици се чести. Во 2022 година, во трагедија во рудникот Ел Пинабете во Коауила загинаа 10 рудари, додека во експлозијата во рудникот Паста де Кончос во 2006 година животот го загубија 65 работници, што е најтешката рударска несреќа во историјата на земјата.

Свет | пред 1 седмица

Мексиканскиот Конгрес го одобри скратувањето на работната недела од 48 на 40 часа

Мексиканскиот Конгрес го одобри законот со кој работната недела во земјата постепено ќе се скрати од сегашните 48 на 40 часа, со планирано намалување по два часа годишно до 2030 година.Реформата, која ќе влијае на околу 13,4 милиони работници, помина во Претставничкиот дом со поддршка на 469 пратеници, додека никој не гласаше против, пренесува Ројтерс.Опозициските пратеници изразија загриженост дека законот не оди доволно далеку во корист на работниците, но по повеќе од десет часа дебата се приклучија на владејачкото мнозинство и го поддржаа законот.Претседателката на Мексико, Клаудија Шајнбаум, го внесе предлог-законот во законодавниот процес во декември 2025 година, по повеќегодишни преговори помеѓу законодавците и приватниот сектор.Целта на законот е подобрување на работните услови и продуктивноста преку постепено намалување на работното време.Реформата претходно оваа година доби општа поддршка во Сенатот, каде владејачката партија Морена има значајно мнозинство.Синдикатите ја критикуваа иницијативата, тврдејќи дека намалувањето по два часа годишно не е доволно и дека не ги решава клучните прашања за работничките права и плати.Аналитичарите сметаат дека реформите во Мексико ќе се соочат и со потенцијални предизвици при примена, особено во приватниот сектор, но напоменуваат дека законот претставува значаен чекор кон модернизација на работното законодавство и подобрување на стандардите за милиони мексикански работници, пренесуваат медиумите.

Свет | пред 1 месец

Кој ќе го наследи „Ел Менчо“? Пет имиња во игра по ликвидацијата на лидерот

Лидерот на картелот Халиско Нова Генерација (ЦЈНГ), Немесио Осегера Сервантес, познат како „Ел Менчо“, беше убиен на 22 февруари во акција на специјалните сили на мексиканската војска во Тапалпа, сојузна држава Халиско. Осегера, кој беше приоритетна цел на федералните власти и бегалец по кој трагаше и Агенција за сузбивање на дрога, починал за време на транспорт кон Мексико Сити.ЦЈНГ во изминатата деценија се прошири низ цело Мексико и се поврзува со трговија со фентанил, метамфетамин и кокаин, како и со перење пари. Според ДЕА, станува збор за една од најмоќните и најнемилосрдни транснационални криминални организации и сериозна безбедносна закана.Експертите за безбедност посочуваат две можни сценарија за иднината на картелот: внатрешно преструктуирање со ново регионално раководство или фрагментација на повеќе фракции, што во двата случаи би можело да доведе до ескалација на насилството.Според анализите, Осегера, за разлика од други криминални кланови, немал јасно дефиниран наследник. Меѓу можните кандидати за преземање на раководството се споменуваат пет имиња.Прв на листата е Хуан Карлос Валенсија Гонзалес, познат како „Ел 03“, посинок на Осегера и негов можен „природен наследник“, за кого ДЕА има распишано награда до пет милиони долари.Како втор можен наследник се наведува Аудијас Флорес Силва, познат како „Ел Хардинеро“, задолжен за операции на картелот во неколку сојузни држави, меѓу кои Халиско и Мичоакан, како и за проширување кон други региони.Третото име е Рикардо Руис Веласко, наречен „Добле Р“, кој дејствува во поширокото подрачје на Гвадалахара, главна оперативна точка на картелот.Меѓу потенцијалните наследници се споменува и Ераклио Гереро Мартинез, „Тио Лако“, поврзан со шеми за нелегална кражба на гориво, познати како „уачикол“.Петтиот кандидат е Гонзало Мендоса Гаитан, познат како „Ел Сапо“, кој раководи со операциите во поморските пристаништа, особено во Манзанило, клучна точка за влез на хемиски прекурсори од Азија.Непосредно по ликвидацијата на Осегера, на западот од Мексико беа регистрирани блокади, палење возила и зголемено насилство. Аналитичарите предупредуваат дека секоја транзиција на врвот на организацијата ретко минува без судири меѓу фракции.Иако ликвидацијата на „Ел Менчо“ се оценува како тежок удар врз организираниот криминал, експертите предупредуваат дека вистинскиот тест ќе биде способноста на властите да спречат нов бран насилство и борба за контрола врз териториите и каналите за трговија.

Свет | пред 1 месец

Кој беше Ел Менчо, наркобосот по чие убиство Мексико се претвори во воена зона

Наркобосот Немесио Рубен Осегера Сервантес, познат под прекарот Ел Менчо, беше убиен вчера во операција на мексиканските специјални сили. Тој беше коосновач и водач на Картелот Jalisco Nueva Generación (CJNG), организација која во последните години израсна во најмоќната криминална група во Мексико.Jalisco Nueva Generación во Мексико е синоним за бруталност. Картелот со седиште во сојузната држава Јалиско стана познат по екстремно насилство и арсенал кој вклучува тешко оружје.CJNG е еден од најагресивните картели во напади врз мексиканската армија, вклучувајќи напади на хеликоптери, а меѓу првите почна да користи дронови за фрлање експлозиви и поставување мини. Обидот за апсење на Ел Менчо во 2015 заврши крваво – припадници на картелот тогаш со ракетен фрлач соборија воен хеликоптер.Во 2020, картелот изврши дрзок атентат во центарот на Сиудад де Мексико, користејќи гранати и автоматско оружје против тогашниот шеф на полицијата на главниот град, кој денес е федерален министер за безбедност.Безбедносниот експерт Едуардо Гереро изјави во 2021 дека властите на двете страни на мексико-американската граница ја сметаат групата за закана по националната безбедност.„Тие имаат огромни количини пари, најсовремено оружје, паравоени групи и возила од воен тип… и претставуваат исклучително сериозен предизвик за мексиканската влада – особено во мали и средни градови каде 50 оперативци на картелот лесно можат да ја надмоќат локалната полиција“, рече тој.Американската агенција за борба против дрога (DEA) го смета CJNG за подеднакво моќен како картелот Синалоа, кој е присутен во сите 50 сојузни држави на САД. Картелот е еден од главните добавувачи на кокаин на американскиот пазар и, како Синалоа, заработува милијарди долари од производство на фентанил и метамфетамин.Картелот Синалоа во последните години е ослабен поради внатрешни конфликти по апсењето на своите водачи Исмаел „El Maya“ Замбада и Гузман, кои се во американски притвор.Ел Менчо потекнува од Агилје во сојузната држава Мичоакан. Кога се преселил во САД како мигрант без документи во 1980-тите, веќе имал први контакти со криминалот, работел на одгледување марихуана во полињата во својата родна сојузна држава.Во 1994 година бил осуден пред федералниот суд во северна Калифорнија за заговор за дистрибуција на хероин и одлежал речиси три години затвор.По враќањето во Мексико, повторно се поврзал со наркобосот Игнасио Коронел Вилареал, познат како Начо Коронел. По смртта на Вилареал, Ел Менчо и Ерик Валенсија Салазар, познат како Ел 85, околу 2007 го основаат CJNG.Исклучиво соработувале со картелот Синалоа, но подоцна се разделиле и со години воделе крвави борби за територија низ Мексико.Една приказна од подземјето тврди дека расколот започнал со бизарен инцидент во Гвадалахара, кога еден наркобос за време на состанок прелил чај од хибискус врз противникот. Тој, наизглед безначаен настан, наводно предизвикал низ предавства, вооружени пресметки и масакри.За разлика од Ел Чапо, кој бараше помош од актерот Шон Пен за да ја претвори својата приказна во холивудски филм, Ел Менчо се држеше подалеку од јавноста. Постојат само неколку негови фотографии.Од 2017 против него повеќе пати се подигнати обвиненија пред федералниот суд во Дистрикт Колумбија. Најновото, подигнато на 5 април 2022, го товари за заговор и дистрибуција на метамфетамин, кокаин и фентанил, како и за користење огнено оружје во врска со кривични дела поврзани со трговија со дрога.Обвинет е и според Законот за борба против наркокартели за водење криминална организација.

Свет | пред 1 месец

(Видео) Мексико во пламен по убиството на Ел Менчо – картелите започнаа одмазда

Мексико западна во невиден хаос откако мексиканските безбедносни сили вчера го убија водачот на моќниот картел Халиско Нова Генерација (CJNG), Немесио Рубен Осегера Сервантес, во подземјето познат како „Ел Менчо“.Неговата смрт претставува тежок удар за најмоќниот мексикански нарко-картел, но истовремено турна големи делови од земјата во насилство и блокади.Како одговор на ликвидацијата на лидерот, припадници на картелот започнаа силен бран насилство низ целата држава.Повеќе од 250 сообраќајници во 20 мексикански сојузни држави се блокирани со запалени возила. Властите во државите Халиско, Мичоакан и Гванахуато пријавија најмалку 14 загинати, меѓу кои и седум припадници на Националната гарда. Наставата во училиштата е откажана во неколку држави.Гвадалахара, главниот град на државата Халиско и еден од градовите домаќини на претстојното Светско првенство, е претворена во „град духови“ – продавниците се затворени, а на граѓаните им се советува да не ги напуштаат своите домови.Во туристичкото летувалиште Пуерто Ваљарта, облаци од густ чад се издигнуваат над хотелите, додека туристите останаа заробени без можност да стигнат до аеродромот. Американската амбасада издаде итно предупредување до своите државјани во повеќе мексикански држави да побараат безбедно засолниште.Според мексиканското Министерство за одбрана, операцијата се одвивала на западот на земјата. Војската се соочила со силен отпор, при што четворица членови на картелот биле убиени, а тројца тешко ранети и подоцна им подлегнале на повредите. Меѓу нив бил и самиот Ел Менчо, кој, според првичните информации, починал за време на хеликоптерскиот транспорт кон Мексико Сити.Запленети се оклопни возила и тешко оружје, вклучувајќи ракетни фрлачи. Операцијата била изведена со разузнавачка поддршка од заедничка американско-мексиканска оперативна група, под силен притисок на администрацијата на американскиот претседател Доналд Трамп за поодлучна борба против картелите.Мексиканската претседателка Клаудија Шеинбаум им честиташе на безбедносните сили, но ја повика нацијата да остане информирана и смирена, додавајќи дека во поголем дел од земјата активностите се одвиваат нормално.Немесио Осегера Сервантес, познат како Ел Менчо, поранешен полицаец, беше еден од најбараните бегалци во светот. Американската влада нудеше награда до 15 милиони долари за информации што би довеле до негово апсење.Под негово водство, картелот Халиско Нова Генерација прерасна од здружение на одгледувачи на авокадо во империја одговорна за значителен дел од дрогата што влегува во САД, преземајќи примат од картелот Синалоа. CJNG стана познат по екстремна бруталност, но и по користење современи технологии, како дронови вооружени со експлозив.Иако ликвидацијата на 59-годишниот Ел Менчо претставува историски успех за безбедносните сили, американските и мексиканските претставници предупредуваат дека хиерархијата на картелот овозможува негов понатамошен опстанок и дека допрва ќе се види какво долгорочно влијание ќе има овој удар врз протокот на дрога кон Соединетите Американски Држави.

Свет | пред 1 месец

(Видео) Судири и насилство во мексички туристички центар по ликвидацијата на најбараниот нарко-бос во Мексико

Насилни сцени се регистрирани во туристичкиот град Пуерто Ваљарта, во сојузната држава Халиско, по информациите за ликвидацијата на Немесио Осегера Сервантес, познат како „Ел Менчо“, водач на наркокартелот Картел Халиско.Според локални извори и објави на социјалните мрежи, по смртта на „Ел Менчо“ избувнале одмазднички напади, при што биле запалени возила и забележано присуство на вооружени лица на улиците. Дел од медиумите ја опишуваат состојбата како сериозна безбедносна криза, со сцени што наликуваат на вооружен конфликт.Засега нема официјални податоци за бројот на жртви или повредени лица, а мексиканските власти не објавија детални информации за размерите на немирите. Безбедносните сили се распоредени во повеќе делови од регионот, додека граѓаните се повикуваат да останат во своите домови.Халиско со години важи за упориште на ЦЈНГ, една од најмоќните криминални организации во Мексико, па аналитичарите предупредуваат дека евентуалната елиминација на нејзиниот лидер може да предизвика нов бран насилство и борба за контрола врз територијата.

Свет | пред 1 месец

Убиен „Ел Менчо“, најбараниот нарко-бос во Мексико

Немесио Осегера Сервантес, познат како „Ел Менчо“, е убиен во воена операција во Мексико, објавија локални медиуми. Тој важеше за најбараниот човек во земјата и лидер на моќниот наркокартел Картел Халиско Нова генерација.Според извештаите, операцијата била спроведена во неделата во раните утрински часови во сојузната држава Халиско, во западниот дел на земјата. Мексиканското Министерство за одбрана соопшти дека Осегера Сервантес починал од повредите здобиени за време на воздушниот транспорт, по завршувањето на воената акција, пренесува агенцијата „Ројтерс“.Картелот ЦЈНГ во изминатите години го прошири своето влијание надвор од матичната држава Халиско и денес делува на територијата на речиси цело Мексико, при што се смета за една од најсилните и најнасилните криминални организации во земјата.Во текот на денот се појавија непотврдени информации за запалени автомобили и вооружени лица на улиците во Халиско и во други делови на државата, што упатува на можни немири поврзани со операцијата.Поради новонастанатата состојба, Стејт департмент издаде предупредување до американските државјани кои се наоѓаат во државите Халиско и Тамаулипас, како и во делови од Мичоакан, Гереро и Нуево Леон, советувајќи ги да останат во засолништа.САД претходно понудија награда од 15 милиони долари за информација што би довела до апсење на „Ел Менчо“, кој со години беше еден од најбараните криминалци во регионот.

Свет | пред 1 месец

(Видео) „Луд танц” на згради за време на земјотресот во Мексико

Мексиканската национална сеизмолошка служба објави дека е регистриран земјотрес со јачина од 6,5 степени според Рихтеровата скала, со епицентар во јужната држава Гереро, на брегот на Тихиот Океан.Според првичните, неофицијални информации, има пријави за повредени лица, а медиумите пренесуваат и за најмалку една жртва, иако официјалните податоци се очекуваат.По силниот удар регистрирани се и повеќе последователни потреси. Има оштетени патишта, паднати столбови, дрвја, прекини на струја, појава на клизишта и оштетувања на здравствени установи.Земјотресот го прекина и првиот новогодишен брифинг на мексиканската претседателка Клаудија Шејнбаум.Веднаш на социјалните мрежи се појавија видеа од згради што се тресат.„Погледнете го овој облакодер во Мексико Сити како прави луд танц повеќе од 20 секунди за време на денешниот земјотрес“, пишува на социјалните мрежи.Земјотресите беа почувствувани и во мексиканските федерални држави Морелос, Халиско, Оахака, Табаско и Колима.

Свет | пред 3 месеци

Трамп најавува дека ќе изврши напади во Мексико за да го спречи шверцот на наркотици во САД

Американскиот претседател Доналд Трамп е подготвен да изврши напади во Мексико доколку е потребно. Негова цел е да се спречи криумчарењето нелегални наркотици во САД.„Вака ќе кажам: Не сум задоволен од Мексико”, рече Трамп.Тој посочи дека нема да одговори на прашањето на новинарите дали би побарал дозвола од мексиканската влада за започнување напади, ни изјави дека е во контакт со властите во Мексико Сити.Трамп очекува поддршка од пратениците од двете партии по обраќањето во Конгресот каде ќе побара дозвола за напади.

Свет | пред 5 месеци

Обилни дождови го пустошат Мексико, најмалку 23 загинати

Најмалку 23 лица загинаа во Мексико поради обилните врнежи што не престануваат од четвртокот, соопштија во петок локалните власти.Според мексиканската Агенција за цивилна заштита, дождови се забележани во 31 од 32 држави, особено во Веракруз, Керетаро и Идалго , како и Сан Луис Потоси.Во државата Идалго се пријавени 16 жртви, а околу 1.000 домови се поплавени. Во Пуебла, загинале 5 лица, 11 се водат како исчезнати, а поплавите погодиле околу 80.000 жители. Во Керетаро загинало дете, додека во Веракруз животот го загубил полицаец.Работиме на тоа да им помогнеме на погодените, да ги отвориме патиштата и да ја вратиме електричната енергија. Остануваме будни и внимателни, изјави претседателката Клаудија Шајнбаум.Секоја година Мексико се соочува со урагани и на пацифичката и на атлантската страна во периодот од мај до ноември.

Свет | пред 6 месеци

Хаос во Канкун: Прекин на електрична енергија предизвика колапс во сообраќајот

Околу 2,3 милиони луѓе останаа без електрична енергија на југоистокот на Мексико, што предизвика хаотична состојба, особено во туристичкиот град Канкун, соопштија локалните власти.Прекинот на струја траел четири часа во петокот навечер поради дефект во врските меѓу неколку мрежи. Половина од потрошувачите во погодените области на сојузните држави Јукатан, Кампечe и Кинтана Ро сè уште биле без напојување.Погодени се околу 2,3 милиони корисници, соопшти Федералната комисија за електрична енергија.Во Канкун престанале да работат семафорите, што довело до сериозни нарушувања во сообраќајот, додека само дел од претпријатијата со сопствени генератори продолжиле со работа.Телефонските услуги биле прекинати повеќе од два часа во делови од градот, кој секоја година го посетуваат милиони туристи.

Свет | пред 6 месеци

(Видео) Хаос во мексиканскиот Сенат: сенатори се степаа за време на седница

Седницата на Сенатот во Мексико заврши хаотично откако избувна физички судир меѓу сенаторите за време на расправата за можната американска воена интервенција во земјата.Инцидентот се случи за време на интонирањето на државната химна, кога лидерот на опозициската партија ПРИ, сенатор Алехандро Морено, му пријде на претседателот на Сенатот, Герардо Фернандес Нороња од владејачката Морена, и го зграби за рака. Следуваше туркање и нагурнување, а во преносот во живо се гледа и како маж во костум се обидува да удри по Нороња, додека Морено урива на под човек во зелена кошула, член на тимот на Нороња. На прес-конференција овој соработник се појави со медицински оковратник и завои на раката.Морено подоцна на социјалните мрежи тврдеше дека реагирал затоа што владејачката партија го сменила дневниот ред за да ја спречи опозицијата да зборува. „Кукавичлукот го предизвика она што се случи. Нека биде јасно: првата физичка агресија дојде од Нороња“, напиша тој. Нороња, пак, ја обвини опозицијата за организиран напад: „Се здружија против мене. Ќе кажат дека тоа е слобода на говор“, изјави тој, додавајќи дека ќе поднесе кривична пријава против Морено бидејќи му се заканил со убиство. Нароња најави и барање за исклучување на Морено и останатите опозициски сенатори кои учествувале во инцидентот.Ова е прв ваков жесток судир во мексиканскиот Конгрес по 2006 година, кога пратеници масовно се степаа пред инаугурацијата на претседателот Фелипе Калдерон по оспоруваните избори.

Свет | пред 7 месеци

Трамп сепак воведе царини за Мексико и Канада и ги зголеми царините за Кина: Пристигнува бесната реакција на Пекинг, Трудо најавува одмазда

Американскиот претседател Доналд Трамп воведе царини од 25 отсто за увоз од Канада и Мексико. Трамп тврди дека истече времето за двата соседи на Америка да постигнат договор со Вашингтон.Се очекува да стапат на сила и дополнителни царини од 10 отсто за кинескиот увоз, со што сите три најголеми трговски партнери на Америка ќе се соочат со значително повисоки трговски бариери.„Нема повеќе време за Мексико или Канада“, рече Трамп. Тој тврди дека тарифите се одговор на неприфатливиот проток на илегални дроги и недокументирани мигранти во САД.„Она што ќе треба да го направат е да ги изградат своите фабрики за автомобили, искрено, и други работи во САД. Во тој случај, нема царини“, рече Трамп.Белата куќа тврди дека Трамп презема „храбри чекори за да ги повика Мексико, Канада и Кина одговорни за нивните ветувања дека ќе го запрат протокот на илегална имиграција и приливот на фентанил во Соединетите држави“.Фентанил е поврзан со десетици илјади смртни случаи од предозирање во САД секоја година.Вол Стрит веднаш ја почувствува веста за воведувањето тарифи. Трите главни индекси во САД потонаа по коментарите на Трамп.Dow Jones Industrial Average го заврши денот со пад од 1,48%, S&P 500 потона за 1,76%, а Nasdaq 2,64%.Кинеската влада соопшти дека ќе преземе одмазднички мерки против планот на администрацијата на Трамп да воведе дополнителни 10% царини за кинескиот увоз - со што вкупната царина ќе достигне 20%.„Кина ќе преземе контрамерки за цврсто да ги заштити сопствените права и интереси“, се вели во соопштението на Министерството за трговија на земјата во вторникот.Пекинг, исто така, ги опиша тарифите на Трамп како „типичен чин на унилатерализам и насилничко однесување“ и ги отфрли обвинувањата дека не прави доволно за да го запре протокот на нелегална дрога во САД.Кина останува најголемиот пазар за американски земјоделски производи дури и откако Пекинг воведе царини до 25% за соја, говедско месо, свинско месо, пченица и пченка во 2018 година - како одмазда за царините за кинески стоки воведени од првата администрација на Трамп.Последната изјава на Министерството за трговија - објавена неколку часа пред да стапат на сила новите тарифи - ги повикува САД да се вратат на „правиот пат“ и „правилно да ги решат разликите преку еднаков дијалог што е можно поскоро“.Со други зборови, Пекинг ја отвора вратата за договор.Според Би-Би-Си, Пекинг ќе ги санкционира американските компании за биотехнологија, воздушна и поморска инженерство.Во меѓувреме, Канада, исто така, вети дека ќе возврати со царини од 25 отсто на американски стоки во вредност од 155 милијарди долари доколку стапат на сила американските царини.Премиерот Џастин Трудо рече дека Канада прво ќе таргетира производи во вредност од 30 милијарди долари, а потоа ќе ги насочи преостанатите 125 милијарди долари во текот на 21 ден.„Нема оправдување за дејствијата [на САД]... Канада нема да дозволи оваа неоправдана одлука да остане без одговор“, рече Трудо во изјавата.

Свет | пред 1 година

Авион се урна во шума во Мексико, најмалку седум загинати

Најмалку седум лица загинаа во падот на мал авион синоќа во шумска област во западната мексиканска држава Халиско.„Авион Цесна 207, кој леташе од Ла Парота, во соседната држава Мичоакан, имаше несреќа и падна во тешко пристапна област во источниот дел на Халиско“, напиша Цивилната заштита на платформата Х, објавувајќи фотографии од местото на несреќата.https://x.com/PCJalisco/status/1870986424436330893Несреќата се случила недалеку од Мазамитла, регионална туристичка дестинација, пишува France Presse, пренесува Index.hr.

Свет | пред 1 година

Во масакрот во Мексико девет загинати, петмина повредени: Напаѓачите пукале во штандот за храна

Девет лица загинаа, а петмина се повредени во пукање на штанд за храна во северно Мексико, јавија локалните медиуми, пренесува Anadolu.Престрелката се случила во градот Апасео дел Гранде во државата Гуанахуато.Според очевидци, напаѓачите прво пукале во вработените, а потоа по случаен избор кон клиентите во близина.На подрачјето каде што се случи нападот беа распоредени голем број полицајци, а беше започната и масовна акција за апсење на напаѓачите кои избегаа. Локалните медиуми објавија дека болничар е еден од убиените во престрелката.Службите за итни случаи соопштија дека нивниот медицински техничар починал во саботата вечерта, но не потврдија дали тој е еден од убиените во нападот.Градовите Апасео ел Гранде и Апасео ел Алто беа погодени од масовни престрелки во последниве години поврзани со завојуваните нарко картели.Картелот Халиско и локалната банда Санта Роса де Лима со години се борат за територија, а Гуанахуато, индустриски и земјоделски центар, со години има најголем број убиства во 32 држави во Мексико.

Свет | пред 1 година

(Видео) Шест убиени и 10 ранети во мафијашка пресметка во ноќен клуб во Мексико

Најмалку шест лица загинаа, а четворица се тешко ранети во масовно пукање во ноќен клуб во градот Вилахермоза, Мексико, јавија мексиканските медиуми. Според соопштението на локалните власти, вооружени напаѓачи влегле во ноќниот клуб околу четири часот наутро со цел да убијат едно лице, додека останатите се колатерални жртви. Првичните информации укажуваат дека се работи за мафијашка пресметка. Пет лица загинале на местото на настанот, додека едно лице починало при пристигнувањето во болница. Напаѓачите побегнале од местото на настанот, а полицијата започнала потрага по нив. Истрагата е во тек.

Свет | пред 1 година

Најмалку 16 лица, меѓу кои и двајца полицајци, загинаа во престрелката: судир на две криминални групи во Мексико

Пукање меѓу две конфликтни криминални групи во мексиканската држава Гереро вчера остави 16 мртви, соопштија властите.Вчера наутро околу 5 часот, завојуваните картели се судрија во рурална, планинска област на државата, која во последните години стана бојно поле.Локалната полиција беше затекната во нападот, двајца полицајци беа убиени, а четворица повредени, соопшти мексиканското Министерство за одбрана. Ранетите се во стабилна состојба по укажаната помош, јавува Ројтерс.На нападот одговори и блиската база на Националната гарда, а тројца воени офицери беа ранети, соопшти Министерството. За 14 загинати се претпоставува дека се членови на криминални групи, а 11 лица се уапсени.

Свет | пред 1 година

19 убиени во престрелка во Синалоа, уапсен лидер на картелот

Во пукање во близина на главниот град на мексиканската држава Синалоа се убиени 19 осомничени членови на банда и уапсен лидер на локален картел, соопшти доцна вчера мексиканското Министерство за одбрана.Судирот се случил во понеделникот кога повеќе од 30 вооружени напаѓачи отвориле оган врз војниците на околу 11 километри од Кулијакан, во Синалоа, се вели во соопштението. Се додава дека некои од напаѓачите побегнале откако федералните агенти возвратиле на оган.Уапсениот осомничен е идентификуван како Едвин Антонио „Н“ - локален водач на картелска фракција поврзана со ко-основачот Исмаел Ел Маја Замбада.Полицијата, исто така, заплени седум возила и речиси 30 огнени оружја, вклучувајќи митралези, муниција, панцири и шлемови.Насилството во Синалоа ескалира по апсењето на Замбада кон крајот на јули во Тексас, што го засили ривалството меѓу картелските фракции, пренесува Ројтерс. Замбада, кој има околу 70 години, тврди дека бил киднапиран од висок член на фракцијата Лос Чапитос и одведен во САД против негова волја.

Свет | пред 1 година

Мексикански градоначалник убиен неколку дена откако дојде на власт, неофицијално е обезглавен

Градоначалникот на мексиканскиот град Чилпансинг е убиен само неколку дена по преземањето на функцијата, пишува Скај Њуз.Алехандро Аркос минатиот понеделник положи заклетва како градоначалник на Чилпанцинго, главниот град на државата Гереро, каде што се наоѓа Акапулко.Областа долго време е зафатена со насилство поради криминалните банди и дрогата. Непроверени извештаи велат дека Аркос бил обезглавен. Полицијата не потврди никакви детали за неговата смрт, но снимката од местото на настанот во Чилпансинг објавена на социјалните мрежи покажува отсечена глава на градоначалникот и на покривот на џип.„За неговата загуба жали целата заедница на Гереро. Ние сме исполнети со бес“, рече гувернерката на Гереро Евелин Салгадо.Државното правобранителство соопшти дека го истражува убиството на градоначалникот. Последното насилство дојде само три дена откако беше убиен секретарот на новата градска влада, Франциско Тапија.

Свет | пред 1 година

Клаудија Шејнбаум официјално стана првата жена претседател на Мексико

Поранешната градоначалничка на Мексико Сити, Клаудија Шејнбаум, вчера официјално стана првата жена претседател на Мексико од независноста на земјата во 1821 година, наследувајќи го популарниот Андрес Мануел Лопез Обрадор на таа позиција.Шејнбаум, климатски научник со еврејско потекло, положи заклетва пред претставници и сенатори во Мексиканскиот конгрес.Во јуни таа победи на изборите со речиси 60 отсто од гласовите, откако излезе пред владејачката левичарска партија Движење за национална обнова (Морена) и сојузниците.Поранешната градоначалника на Мексико Сити ја презема функцијата од нејзиниот ментор, Андрес Мануел Лопез Обрадор, кој ја воведе во политиката во 2000 година како заменик за еколошки прашања во градското собрание на мексиканската престолнина.Веднаш по победата таа најави дека нејзината влада ќе биде фискално одговорна и ќе ја почитува автономијата на централната банка. Најави и дека ќе ја зајакне безбедноста на земјата.

Свет | пред 1 година

Петмина загинати во експлозија во фабрика за текила во Мексико

Во експлозија во фабрика за пијалоци во Мексико загинаа најмалку пет лица, а двајца се повредени, соопштија денеска локалните власти.Државната агенција за цивилна заштита доцна во вторникот на платформата X објави дека експлозијата се случила во градот Текила во државата Халиско во западно Мексико.Службите за итни случаи ја евакуираа областа околу централата како мерка на претпазливост, а властите рекоа дека на жителите подоцна им било дозволено да се вратат во своите домови.Оттаму соопштија и дека пожарот набрзо бил локализиран, но дека пожарникарите и итната помош се уште се на терен.

Свет | пред 1 година

Мексико ја избра Клаудија Шајнбаум за прва жена претседател со убедлива победа

Клаудија Шајнбаум беше избрана за прва жена претседател на Мексико, со најмалку 58,3 отсто од гласовите, според брзото пребројување на изборната комисија на Мексико.Најблискиот ривал, Ксочитл Галвез од опозициската коалиција, доби најмалку 26,6 отсто од гласовите, додека Хорхе Алварез Мајнез, кандидатот на центристот Мовимиенто Сиудадано, е трет со најмалку 9,9 отсто од гласовите, пишува Гардиан.Брзото пребројување беше одложено неколку пати без објаснување од страна на изборната комисија, што го натера Галвез да фрли сомнеж во неговата веродостојност, и покрај огромниот јаз во излезните анкети. „Гласовите се таму. Не смееме да дозволиме да ги кријат“, напиша Галвез на X.Како што доаѓаа резултатите, поддржувачите на владејачката партија Морено на Шајнбаум отпатуваа на симболичниот главен плоштад во Мексико Сити, Зокало, каде што Шајнбаум требаше да одржи победнички говор.

Свет | пред 1 година

Нема фотографија

(Видео) Се урна бина на предизборен митинг во Мексико: Најмалку девет мртви

Најмалку девет лица загинаа, а околу 50 се повредени откако се урна бина на предизборен митинг во Мексико, соопштија локалните власти. Инцидентот се случил додека претседателскиот кандидат на левиот центар Хорхе Алварез Мајнез држел говор во градот Сан Педро Гарза Гарсија. Уривањето на бината е предизвикано од ненадеен силен налет на ветер, напиша Мајнез на Х, а пренесе Би-би-си.На социјалните мрежи се појавија снимки на кои се гледа моментот кога конструкцијата се урна додека неколку луѓе беа на сцената. Гувернерот на државата Самуел Гарсија ги повика локалните жители да останат дома поради силните грмотевици во областа.Мајнез е кандидат на партијата Граѓанско движење и моментално е на третото место во националните анкети. Во објава на Х тој изјави дека самиот не е повреден, но дека се повредени неколку членови на неговиот тим.https://x.com/brauliolunan/status/1793475806599204973

Свет | пред 1 година

Дизајнирана апликација за зачувување пораки и последни желби на покојникот

Мексиканецот Мигел Фарел дизајнираше апликација за зачувување пораки и последни желби, кои корисникот би сакал да ги сподели со најблиските по неговата смрт.Апликацијата наречена „Past Post“, „му овозможува на корисникот да остава пораки што ќе се користат по неговата смрт“, изјави нејзиниот креатор, претприемачот Фарел, за AFP.Како пример, тој напомена дека таткото може да сними честитки кои неговите деца ќе ги слушаат со години подоцна кога ќе дипломираат, доколку тој во меѓувреме умре.Апликацијата зачувува видеа во форма на NFT, сертификат за автентичност поврзана со компјутерска датотека што може да биде слика, текст или парче музика, што не може да се копира или менува.Фарел рече дека „Past Post“ чини 19 долари годишно и може да се користи за претходно снимање на насоки за сопствениот погреб или други тековни работи, како што се банкарски сметки и лозинки за сметки на социјалните мрежи.Дизајнерот предупреди дека апликацијата не е дигитален тестамент бидејќи не може да замени вистински тестамент бидејќи законот бара заверен документ.Документот создаден од апликацијата „нема никаква правна вредност, но има многу важна симболичка вредност“, додаде Фарел.

Магазин | пред 3 години