Неверојатна спасувачка акција заврши со среќен исход откако двајца мексикански рибари преживеале пет дена на отворено море, пловејќи на голем пренослив ладилник. Тие биле пронајдени без храна и вода, повеќе од 160 километри од брегот, соопшти мексиканската морнарица.
Потрагата по двајцата рибари била започната на 14 август, откако нивната рибарска задруга пријавила дека изгубила контакт со членовите на екипажот, на возраст од 53 и 32 години. Во потрагата биле вклучени авиони и пловни објекти на мексиканската морнарица, кои пребарувале голем дел од Тихиот Океан.
Според информациите што ги пренесува „Ел Паис“, нивниот рибарски брод бил погоден од силен бран во текот на ноќта, по што потонал. Двајцата успеале од морето да го извлечат големиот ладилник во кој го чувале уловот. Се качиле врз него и така преживеале пет дена на отворено море, без храна и вода.
Рибарите на крајот биле пронајдени на околу 240 километри од брегот на јужната мексиканска држава Чијапас, во близина на границата со Гватемала.
Мексиканската морнарица објави снимка од спасувањето, на која се гледа голем тиркизен ладилник како плови по брановите, додека кон него се приближува спасувачки брод. Рибарите биле извлечени на безбедно, а потоа со хеликоптер биле пренесени до пристаниште.
По лекарскиот преглед, двајцата биле пуштени и се вратиле кај своите семејства. Нивниот идентитет не е објавен, а причината поради која дошло до потонување на рибарскиот брод засега не е позната.
„Не верувавме дека ќе ги преживееме овие денови“, рекол еден од спасените рибари во видеото објавено од морнарицата. Тој додал дека во тие моменти им преостанувало само да се молат и да се надеваат дека спасувачките екипи ќе ги пронајдат.
Неговиот колега го опишал преживувањето како исклучително тешко искуство. Двајцата потврдиле дека во текот на петте дена поминати на море не јаделе и не пиеле ништо.
