(Видео) Мексико под закана од силен ураган со ветрови до 195 километри на час

Ураганот Труди, кој се движи кон југозападните и западните делови на пацифичкиот брег на Мексико, се засили и достигна трета категорија.

— реклама —

Утрово, ураганот се наоѓал на околу 385 километри југозападно од Акапулко и на околу 535 километри југоисточно од Мансанило, објави Асошиејтед прес.

Максималната постојана брзина на ветерот достигнала 195 километри на час, а невремето се движело кон северозапад со брзина од девет километри на час, соопшти американскиот Национален центар за урагани во Мајами.

— реклама —

За мексиканскиот брег е издадено предупредување за ураган, додека за подрачјето од Сиуатанехо долж брегот до Мансанило е на сила предупредување за тропска бура, се наведува во соопштението на центарот.

— реклама —

Северозападно од ураганот Труди се движела тропската бура Сајмон, со ветрови со брзина од 75 километри на час. Според прогнозите, таа наскоро би требало да ослабне.

Во меѓувреме, за Гуам и Рота е издадено предупредување за тајфун, додека за Тинијан, Сајпан и околните подрачја е на сила предупредување за тропска бура.