Мексиканскиот Конгрес го одобри скратувањето на работната недела од 48 на 40 часа

Мексиканскиот Конгрес го одобри законот со кој работната недела во земјата постепено ќе се скрати од сегашните 48 на 40 часа, со планирано намалување по два часа годишно до 2030 година.

Реформата, која ќе влијае на околу 13,4 милиони работници, помина во Претставничкиот дом со поддршка на 469 пратеници, додека никој не гласаше против, пренесува Ројтерс.

— реклама —

Опозициските пратеници изразија загриженост дека законот не оди доволно далеку во корист на работниците, но по повеќе од десет часа дебата се приклучија на владејачкото мнозинство и го поддржаа законот.

— реклама —

Претседателката на Мексико, Клаудија Шајнбаум, го внесе предлог-законот во законодавниот процес во декември 2025 година, по повеќегодишни преговори помеѓу законодавците и приватниот сектор.

Целта на законот е подобрување на работните услови и продуктивноста преку постепено намалување на работното време.

— реклама —

Реформата претходно оваа година доби општа поддршка во Сенатот, каде владејачката партија Морена има значајно мнозинство.

Синдикатите ја критикуваа иницијативата, тврдејќи дека намалувањето по два часа годишно не е доволно и дека не ги решава клучните прашања за работничките права и плати.

Аналитичарите сметаат дека реформите во Мексико ќе се соочат и со потенцијални предизвици при примена, особено во приватниот сектор, но напоменуваат дека законот претставува значаен чекор кон модернизација на работното законодавство и подобрување на стандардите за милиони мексикански работници, пренесуваат медиумите.