Тројца луѓе се пронајдени мртви, а повеќе од десет припадници на итните служби се ставени во карантин по изложеност на неидентификувана супстанца во рурална куќа во американската сојузна држава Ново Мексико.
Полицијата соопшти дека четири лица биле пронајдени без свест во куќа источно од Албукерки, при што тројца починале, а четвртото лице е хоспитализирано, пренесува Асошиејтед прес.
За време на интервенцијата, 18 припадници на итните служби биле изложени на супстанцата и почнале да чувствуваат симптоми како мачнина и вртоглавица.
Сите биле пренесени во Универзитетската болница во Ново Мексико, каде што се наоѓаат под надзор во карантин, додека двајца спасувачи се во тешка состојба.
На терен интервенирале и специјализирани тимови за опасни материи од противпожарно-спасувачките служби на Албукерки, кои се обидуваат да ја идентификуваат супстанцата.
„Во моментов, истражителите веруваат дека супстанцата може да се пренесува преку контакт и не сметаат дека се шири преку воздухот“, соопшти полицијата, додавајќи дека нема опасност за јавноста и дека околу куќата е поставен безбедносен периметар.
