Најмалку десет лица загинаа, а 64 се повредени во експлозија на пиротехнички средства за време на верска прослава во мексиканската сојузна држава Мексико.
Несреќата се случила во сабота навечер во општината Темаскалсинго, кога детонацијата предизвикала уривање на ѕид во близина на црквата „Нуестра Сењора де ла Лус“, соопштија локалните власти.
Експлозијата се случила додека стотици жители се подготвувале за огнометот што требало да биде дел од верскиот фестивал. Темаскалсинго има околу 66.000 жители и се наоѓа на околу 160 километри северозападно од главниот град, Мексико Сити.
Меѓу повредените има и двајца свештеници, потврдил локалниот бискуп. Снимките објавени на социјалните мрежи покажуваат хаотични сцени по детонацијата, додека луѓе во облак од чад ги пребаруваат урнатините во потрага по преживеани.
Канцеларијата на јавниот обвинител отвори истрага, а причината за експлозијата засега не е официјално утврдена.
Несреќите поврзани со пиротехнички средства се чести во Мексико, каде огнометот традиционално се користи за време на улични прослави и верски фестивали. Пред речиси четири години, при силна експлозија во село во рамки на општината Уехутла во сојузната држава Идалго, беа повредени 17 лица.
