„Има груба манипулација од локален јавен обвинител, соучесник во процесот, постои поинаков извештај од приложениот“, Мицкоски за враќањето на пасошот на Марковски

Премиерот Христијан Мицкоски на денешната прес-конференција изјави дека случајот со враќањето на пасошот на обвинетиот за злоупотреби Борче Марковски ќе биде предмет на истрага, оценувајќи дека постојат сериозни неправилности во постапката.

— реклама —

Одговарајќи на новинарско прашање, Мицкоски рече дека, според него, станува збор за груба манипулација од страна на локален јавен обвинител, за кого тврди дека е соучесник во целиот процес.

— реклама —

„Мислам дека тука има груба манипулација од еден локален јавен обвинител во Вишото јавно обвинителство, којшто е соучесник во овој процес и тоа нема така да заврши“, изјави Мицкоски.

Тој додаде дека засега нема да посочува конкретни имиња, бидејќи, како што рече, претстои истрага која треба да ги утврди сите околности.

— реклама —

Премиерот истакна дека, според информациите со кои располага Владата, постои разлика меѓу извештајот на Основното јавно обвинителство и записникот што бил доставен од Вишото јавно обвинителство во Битола.

— реклама —

„Од страната на надлежното Основно јавно обвинителство имаме поинаков извештај од тој што е приложен како записник од страна на Вишото јавно обвинителство. Ова нема така да заврши“, нагласи Мицкоски.