Инцидент со опасна материја во Пентагон: Блокирани катови и делумна евакуација

Повеќе катови и ходници во Пентагон се блокирани, а делови од зградата се евакуираат поради инцидент поврзан со опасна материја, потврдија повеќе извори и локалната противпожарна служба.

— реклама —

Портпаролот на Пентагон, Шон Парнел, соопшти дека системите во седиштето на американското Министерство за одбрана детектирале проблем со квалитетот на воздухот, поради што се активираа мерки на претпазливост додека не се утврди природата на инцидентот.

„Министерството ги спроведува стандардните безбедносни протоколи, вклучително и наредбата за останување во затворен простор во погодените области“, изјави Парнел, додавајќи дека тимовите за итни интервенции се на терен и се подготвени да им помогнат на лицата што се наоѓаат во зградата.

— реклама —

Во интервенцијата се вклучени тимот за опасни материи на Агенцијата за заштита на Пентагон, како и противпожарната служба на округот Арлингтон. Оттаму информираа дека нивните екипи постапуваат во рамки на инцидент со опасни материјали во комплексот.

— реклама —

Во порака испратена до вработените е наведено дека е откриен проблем со квалитетот на воздухот и дека се спроведуваат дополнителни тестирања, кои би можеле да траат еден до два часа.

Според неофицијални информации, блокирани се катовите од вториот до петтиот, како и ходниците од четвртиот до седмиот дел од огромниот комплекс. Еден од изворите за Си-Ен-Ен изјави дека полицајците во Пентагон носат гас-маски и целосна хемиска заштитна опрема.

Засега не е познато за каква супстанца станува збор, а истрагата за инцидентот е во тек.