Во десет општини и градови во Србија денеска се одржаа локални избори, кои беа проследени со бројни инциденти и тензии на повеќе гласачки места.
Граѓаните гласаа во Бор, Смедеревска Паланка, Бајина Башта, Кула, Лучани, Аранѓеловац, Кладово, Књажевац, Мајданпек и во градската општина Севојно во Ужице.
Една од општините каде што беа забележани сериозни нерегуларности е Кула, каде граѓани изразија сомнежи за купување гласови и постоење дупли избирачки списоци во објекти во близина на избирачките места.
Според информации од терен, полицијата го обезбедувала пристапот до овие објекти, додека пред нив имало собрани граѓани кои се обидувале да го спречат влегувањето на лица поврзани со владејачката партија. Во еден момент дошло до турканици, а приведени се и лица.
Во исто време, државниот сервис РТС извести со поинаква верзија на настаните. Според нивниот извештај, поддржувачи на опозицијата и студентските листи биле тие кои се собирале пред објектите, провоцирале и се обидувале да влезат, при што полицијата интервенирала за да спречи ескалација.
Спротивставените информации за случувањата на теренот ја отсликуваат високата политичка напнатост и недоверба што го обележаа изборниот ден во дел од српските општини.
