Градоначалникот на Град Скопје, Орце Ѓорѓиевски, информира дека градежните активности во главниот град се одвиваат со засилена динамика, оценувајќи дека реализацијата на проектите е доказ дека ветувањата се претвораат во конкретни дела.
Тој посочи дека во тек е втората фаза од реконструкцијата на улицата „Фрањо Клуз“, една од клучните сообраќајници во општина Аеродром. По, како што наведе, децениска запоставеност, улицата добива нов двослоен асфалт, нови рабници и целосно уредени тротоари, со цел подобрување на безбедноста и функционалноста за сите учесници во сообраќајот.
Паралелно, интензивни градежни зафати се реализираат и на улицата „Никола Парапунов“, каде се поставуваат нови, пошироки и побезбедни тротоари, со подобрена пешачка пристапност и современо урбано уредување. Според Ѓорѓиевски, со овие интервенции просторот добива нов лик, а жителите – поквалитетни услови за секојдневно функционирање.
Тој најави дека со подобрување на временските услови, од пролет ќе започне реализацијата на повеќе капитални проекти кои, како што истакна, ќе придонесат за засилена инфраструктурна трансформација на градот.
„Ова е новото време за Скопје. Време на работа, резултати и одговорност“, порача Ѓорѓиевски, додавајќи дека активностите ќе продолжат со засилено темпо во наредниот период.
