Градоначалникот на Скопје, Орце Ѓорѓиевски соопшти дека денеска се поставуваат последните слоеви асфалт на потегот од Стара Рампа до семафорите кај Црвениот Крст, во рамки на реконструкцијата на булеварот „Македонија“ во Скопје.
Според него, во првата фаза од проектот е извршена реконструкција и рехабилитација на постојниот коловоз, како и проширување на дел од сообраќајните ленти на булеварот „Борис Трајковски“, улиците „11 Октомври“ и „Пролет“, како и крак од булеварот „Македонија“.
Ѓорѓиевски истакна дека улицата „Пролет“ е проширена со дополнителна коловозна лента на потегот од полициската станица „Пролет“ до Тутунскиот комбинат, а раскрсниците се уредени со нови сообраќајни острови.
Во текот на вечерта ќе биде извршено и целосно обележување на коловозот, по што сообраќајницата ќе биде подготвена за користење.
Тој најави дека во следните фази ќе се градат кружен тек кај „Нова Македонија“, уште два кружни тека меѓу булеварот „Кочо Рацин“ и улицата „Јордан Мијалков“, како и проширување на булеварот „Св. Кирил и Методиј“.
Паралелно, се работи и на атмосферската канализација, при што се поставуваат повеќе од 60 шахти и сливници.
Подземната сообраќајница, која е дел од третата фаза, ќе има шест ленти – четири за автомобилски сообраќај и две за јавен превоз, како и пешачки патеки. Според проценките на градските власти, со нејзиното пуштање во употреба се очекува намалување на метежот за 33 проценти.
