Таксистите низ Грција започнаа 24-часовен национален штрајк, со цел уште еднаш да го изразат нивното незадоволство и несогласување за новиот закон од Министерството за транспорт што воедно се однесува и на такси превозот, а во текот на денешниот ден се очекува да биде ставен на гласање пред пратениците
Федерацијата ги повика синдикатите на таксистите низ целата земја да се приклучат на протестот во Атина, при што возачите ќе се соберат во 11 часот пред канцелариите на атинскиот синдикат на таксисти, а потоа ќе маршираат пеш кон парламентот.
Синдикатот на таксисти на Аттика (SATA) изјави дека секторот ќе „реагира масовно“, против она што го опиша како „подмолни одредби на закон за добивка“.
Такси возачите, не се согласуваат со одредбите од законот што се однесуваат на задолжителната замена на возилата во Солун и Атина со целосно електрични, како и одредбите со кои, како што велат, им се дава предност на приватните возила со возач.
Законот исто така ги проширува основите за одземање лиценци за такси, вклучувајќи осуди за опасно возење или попречување на транспортот – мерки кои федерацијата ги критикува како казнени.
