Основниот суд во Свети Николе донесе неправосилна пресуда со која 21-годишен жител на светиниколското село Сарамзалино е осуден на една година затвор за семејно насилство, откако брутално ја претепал својата 34-годишна бремена партнерка и ја држел заклучена во соба околу 15 часа.
Судот го прогласи обвинетиот за виновен за две кривични дела – „Телесна повреда“ и „Противправно лишување од слобода“, а мерката притвор му е продолжена до правосилноста на пресудата, но не подолго од 60 дена.
Според обвинението на Основното јавно обвинителство Свети Николе, настанот се случил на 19 и 20 февруари во семејниот дом, каде обвинетиот најпрво ја навредувал, а потоа физички ја нападнал својата партнерка.
Тој ѝ го одзел мобилниот телефон и клучевите од автомобилот, ја заклучил во соба и ѝ ја ограничил слободата на движење. Во текот на нападот ѝ нанел повеќе телесни повреди, удирајќи ја со тупаници и боксови по главата и телото.
Според Обвинителството, кога жената се онесвестила, тој ја однел во бањата и ја освестил со ладна вода, по што продолжил со физичкото малтретирање. Кога се обидела да избега, повторно ја заклучил и ја држел против нејзината волја околу 15 часа.
