Во Основниот суд во Скопје денеска продолжи судењето за трагедијата во Тафталиџе, во која шестгодишната Катја и нејзината мајка Ивана починаа по пад од балкон, а за случајот е обвинет таткото Стојанче Јовановски.
Пред судот сведочеше наставничката од училиштето „Јохан Хајнрих Песталоци“, која раскажа за однесувањето на девојчето и за настаните што претходеле на трагедијата.
Таа сведочеше дека за време на игра во училницата забележала како Катја паѓа на подот, по што ја прашала дали се работи за игра.
„Катја рече дека татко ѝ кога ја удира мајка ѝ, таа така паѓа“, изјави наставничката.
По ова, веднаш бил известен училишниот психолог, кој разговарал со детето, а потоа и со мајката, која била упатена каде да се обрати во случај на семејно насилство. Наставничката посочи дека иако ова било загрижувачко, во секојдневното однесување Катја не покажувала знаци на вознемиреност.
„Катја се однесуваше како и сите други деца, беше отворена, другаруваше со сите, изгледаше среќно. Не помисливме дека нешто се случува во семејството“, рече таа.
Како дополнителен индикатор, наведе дека девојчето најчесто цртало само мајка си.
„Кога ја прашав зошто, рече: ‘Јас сум со мама’“, сведочеше наставничката.
Таа раскажа и за момент кога таткото на Катја влегол во училницата, иако тоа не било дозволено.
„Катја кога го виде се израдува, го поведе кон шкафчињата, а учениците му даваа комплименти. По неколку минути влезе и Ивана и заедно заминаа“, рече таа.
За денот на трагедијата, наставничката изјави дека Катја била донесена од бабата, а подоцна забележала дека не носи дел од униформата.
„Рече дека не знае каде е, дека мајка ѝ веројатно го испрала. Беше облечена во нова облека и рече: ‘Вчера бевме во шопинг со мама’, беше многу среќна“, изјави наставничката.
Подоцна, околу 13:30 часот, мајката дошла во училиштето и ја зела Катја.
„Секогаш кога мајка ѝ ќе ја земеше, таа беше многу среќна. И тој ден се гушкаа и се бакнуваа“, рече таа.
Наставничката додаде дека таткото еднаш повторно дошол во училиштето, вознемирен, барајќи контакт од родител на друго дете, при што му било укажано дека ваквите ситуации се решаваат преку училиштето.
Судењето продолжува.
