Иран рано утринава изврши напад со ракети и дронови врз Саудиска Арабија, при што избувна голем пожар во индустрискиот комплекс Ал Џубаил, еден од клучните енергетски и петрохемиски центри во земјата.
Според саудиското Министерство за одбрана, противвоздушната одбрана пресретнала седум балистички проектили насочени кон источниот дел на земјата, а делови од нив паднале во близина на енергетски постројки. Проценката на штетата е во тек.
Ал Џубаил е меѓу најголемите индустриски зони во регионот, со над 150 капацитети и значително учество во економијата на Саудиска Арабија. Снимките од терен покажуваат силни експлозии и обемен пожар.
Нападот доаѓа во услови на засилени тензии меѓу Иран и САД, откако американскиот претседател Доналд Трамп се закани со напади врз иранска инфраструктура доколку Техеран не го отвори Ормутскиот теснец.
Иран ги осуди заканите, нарекувајќи ги „арогантна реторика“, и повика на симболични протести во земјата. Воедно, предупреди дека во случај на ескалација може да таргетира енергетска инфраструктура и во други држави.
Во изминатите денови, според извештаи, биле цел на напади и објекти во Кувајт, Бахреин и Обединетите Арапски Емирати, додека земјите од Заливот остануваат во состојба на зголемена подготвеност.
