СЛАВЈАНКА ПЕТРОВСКА

Поранешната министерка го искритикува наследникот во Одбрана: Нема нови набавки, нема реформи во Армијата

Поранешната министерка за одбрана Славјанка Петровска информира дека денеска се промовирани 17 „Страјкери“, лесни оклопни возила кои се дел од договорот за набавка со Соединетите Американски Држави, склучен во 2021 година.Таа посочи дека овој договор е еден од вкупно седумте договори „влада со влада“ реализирани во периодот на владите предводени од СДСМ, оценувајќи дека станува збор за значаен чекор во процесот на модернизација и опремување на Армијата.Сепак, Петровска изрази загриженост дека во изминатите две години, освен најави за „историски“ набавки и буџет за одбраната, не се забележува конкретен напредок. Според неа, во овој период не е склучен ниту еден нов договор за модернизација на Армијата.Таа оцени дека состојбите во одбранбениот сектор не се во согласност со изјавите на актуелниот министер Владо Мисајловски, наведувајќи дека нема нови набавки, нема зголемување на платите, нема нов колективен договор, ниту пак нови вработувања во критичните специјалности. Дополнително, според Петровска, изостануваат унапредувања по заслуги, реформи во системот за справување со кризи и несреќи, како и поширок напредок во секторот.Во својата реакција, Петровска упати и директна критика кон министерот Мисајловски, обвинувајќи дека избегнува јавен дуел, при што порача дека „на лагата ѝ се кратки нозете“.

Македонија | пред 5 дена

Од судница до Брисел: Политичките ривали на иста маса во НАТО

Пратеничката од СДСМ, Славјанка Петровска, и пратеникот од ВМРО-ДПМНЕ, Драган Ковачки, заедно учествуваат на состаноците на Парламентарно собрание на НАТО што се одржуваат во Брисел, по низата јавни препукувања и меѓусебни политички обвинувања во изминатиот период.Двајцата пратеници, покрај соочувањата во Собранието, претходно се најдоа и во судница, откако Петровска поднесе тужба за клевета против Ковачки, поврзана со негови тврдења дека таа поседува хациенда во Бутел.Во објава на социјалните мрежи, Петровска информираше дека учествува на редовните состаноци на Парламентарното собрание на НАТО, оценувајќи дека тоа претставува можност за размена на ставови и за презентација на позициите на претставниците на Алијансата и на Европската унија во контекст на актуелните геополитички движења.„НАТО останува обединето и цврсто посветено на заштитата на безбедноста на граѓаните на својата територија. Сојузниците се свесни за промената на облиците на заканите и континуирано ги прилагодуваат своите безбедносни и одбранбени системи на новите предизвици“, напиша Петровска.Настанот во Брисел се одвива во време на засилени безбедносни тензии на европскиот континент, при што се очекува фокусот да биде ставен на колективната одбрана и одговорот на новите глобални предизвици.

Македонија | пред 1 месец

Петровска до АНБ : Зошто бил сменет шефот на внатрешната контрола, дали полиграфистот си дал отказ?

Пратеничката од СДСМ, Славјанка Петровска, побара Агенцијата за национална безбедност (АНБ) да изврши декласификација или делумна декласификација на документите поврзани со актуелниот случај, со цел јавноста да биде целосно информирана.„Јас ќе го повторам барањето, дека овој надзор се прави од интерес на јавноста и на граѓаните и тие треба да ни бидат императив во нашето работење како пратеници, како претставници на народната власт. Не знам дали Агенцијата за национална безбедност ќе има слух, да изврши деласификација или делумна декласификација, се во интерес за да можеме во детали да ѝ соопштиме на јавноста,“ изјави Петровска.Таа посочи дека очекува увид во сите документи што ќе бидат побарани од комисијата, без ограничувања. „Она што го очекувам од овој надзор е да не биде дозволен увид во сите документи кои ќе ги побараме, кои агенцијата се разбира смета дека треба да ни бидат достапни, но и оние кои ќе ги побараме на наша барање,“ рече таа.Петровска истакна дека веќе подготвила околу триесетина прашања за надзорот, насочени кон расчистување на скандалот.„Едно од тие прашања кои ќе ги поставам, а за жал ако состанокот ќе биде класифициран, нема да може да ви го дадам јас одговорот, е што се случило со полиграфистот кој се посочува, барем во брифинзите кои ги има дел од јавноста, како клучен, односно тој кој ги спровел полиграфските тестирања. Дали е тој сè уште на работа, дали заминал, дали заминал под притисок итн? Што се случило со шефот на внатрешната контрола, зошто тој бил сменет? Според мои информации, можеби не е вистина, но зошто тој бил сменет непосредно пред да започне оваа внатрешна истрага во агенцијата и така натаму?“ праша Петровска.Таа нагласи дека сите овие прашања се во интерес на надзорот и откривањето на вистината околу, како што рече, „таканаречениот скандал“.

Македонија | пред 6 месеци

Петровска: АНБ веднаш може да ја декласифицира документацијата, законот е јасен

Пратеничката на СДСМ, Славјанка Петровска, денеска порача дека е неопходна итна декласификација на целата документација поврзана со случајот во Агенцијата за национална безбедност (АНБ), кој, како што рече, власта се обидува да го претстави како скандал.„Декласификацијата е чекор кон вистината, а не кон манипулацијата. Таа ќе ги даде одговорите на прашањата кои изминативе денови се отворија, а власта одбегнува да ги даде криејќи се зад класифицирани документи,“ истакна Петровска.Таа потсети дека за декласификација не е потребна судска постапка, спротивно на тврдењата од АНБ. „Законот за класифицирани информации јасно вели – оној што класифицира, тој и декласифицира. Според член 14, промена на степенот на класификацијата врши создавачот. Дополнително, член 20 предвидува дека информација со класификација не се смета за класифицирана ако со неа се прикрива кривично дело, злоупотреба на функцијата или друг незаконски акт. Ако власта тврди дека имало незаконско работење, тогаш овој член овозможува веднаш, без одлагање, да се направи декласификација,“ објасни Петровска.Како втор чекор таа го посочи итното свикување на Комисијата за надзор над работата на АНБ. „Пратениците кои сме дел од Комисијата мораме да извршиме увид во документацијата што ќе биде декласифицирана и потоа да ја информираме јавноста. Со тоа ќе се надмине и пречката околу безбедносниот сертификат на претседателот на Комисијата. Со ваков пристап брзо ќе се расчисти маглата која ДПМНЕ ја пушта за да ги покрие досегашните скандали и да создаде алиби за идејата за спојување на АНБ и АР,“ рече таа.Во однос на случајот, и ВМРО-ДПМНЕ вчера побара итно да се закаже седница на собраниската Комисија за надзор на работата на АНБ и АР, по информациите за незаконско прислушување во периодот од 2019 до 2024 година.Пратеникот Љупчо Пренџов, член на Комисијата, побара од претседателот Скендер Реџепи да закаже седница на која ќе се утврди термин за официјална посета на АНБ и детално разгледување на состојбата. Но, Реџепи одби да свика седница со образложение дека е дискриминиран и дека не може да учествува, бидејќи сè уште нема добиено безбедносен сертификат, за кој поднел барање кон крајот на минатата година.

Македонија | пред 6 месеци

Независниот синдикат на професионални војници поднесе кривична против ексминистерката Славјанка Петровска

Поради тоа што веќе 11 месеци незаконски е спречено фунционирањето на Независниот синдикат на професионалните војници, тие денеска поднесоа кривична пријава против ексминистерка за одбрана Славјанка Петровска.Тие најавија и дека ќе излезат на протести доколку во најбрз можен рок не се одблокира синдикалното здружување кое се бори за правата на професионалните војници во Армијата.Независниот синдикат останал блокиран и по промената на власта и без можност да се решаваат спорните прашања за професионалното служење во македонската армија.Според Александар Насковски, претседател на Независниот синдикат на професионални војници, ниту новиот министер за одбрана Владо Мисалјловски не направил ништо да го одблокира независниот синдикат на професионалните војници, а за проблемот се известени и премиерот и врховниот командант на Армијата, претседателката Гордана Сиљановска Давкова.Ако не се седне наскоро на маса и не продолжи социјалниот дијалог со синдикатот, кон протестот на професионалните војници ќе се приклучат и поранешните припадници на Армијата.Синдикалците сметаат дека се потребни итни измени на Законот за служба и на Колективниот договор на МО.

Македонија | пред 1 година

Петровска: Освен коруптивен кредит од 500 милиони евра, ДПМНЕ не испорача ништо во првите 100 дена

Во првите 100 дена ВМРО-ДПМНЕ не испорача ништо од она што ветуваше, освен коруптивниот скандал на владата, со задолжувањето од 500 милиони евра, рече пратеничката на СДСМ, Славјанка Петровска, на гостувањето во вестите на Алсат телевизија.- И, по 100 дена, од кој не видовме ништо, жално е што повторно се враќаме во времињата кога владееше ДПМНЕ и кога партијата им беше пред и над се, а потоа сè останато. ДПМНЕ и ВЛЕН не ги поврзува државниот туку личниот интерес, рече Петровска.Таа го коментираше и заглавувањето на европскиот пат и рече дека нема да се случи ништо, затоа што власта има други интереси.- Иднината на државата кога ДМНЕ е на влсат е секогаш во втор план. Па власта во Брисел отиде да бара уставни измени со одложено дејство, а оттаму се вратија како попарени без да и кажат на јавноста дека предлогот им е одбиен, односно дека не е тоа опција. Иако ветуваа Преговарачката рамка не може да се промени и тоа е ставот на Европската унија. Се е само замајување на јавноста и давања изговори, рече Петровска.Таа потенцираше дека граѓаните не сакаат да слушаат изговори туку план, особено што пред избори ДПМНЕ велеа дека имаат план како да ги променат за засилено да продолжат на патот кон ЕУ.- За време на изборите тврдеа дека имаат план, за сега кога сте на власт, да дадете онаква дрска и кафеанска изјава, ’Не благодарам за ЕУ‘, па апсолутно никој не им го дал тоа право на ДПМНЕ, објасни Петровска.Оваа власт не покажува никаков капацитет, и не видовме ништо од она што ветуваше. Поверојатно е дека до крајот на годината ќе се случи реконструкција на власта, од каков било потег кој би бил корисен за граѓаните, додаде пратеничката на СДСМ, Славјанка Петровска.

Македонија | пред 1 година

Петровска: ДПМНЕ побрзо да се опаметат, држава водат, а не гранапче

,,Фатени во скандали за само 20 дена власт на локално ниво, пола Македонија изгоре заради нивните неспособни градоначалници упорно се обидуваат да ме замолчат за прашањата на кои одговор чека македонската јавност и тоа со повторување на една иста лага од Центарот за манипулации и дезинформации на ДПМНЕ.Барате одговор, еве ви: Немам хациенда и никогаш не сум поседувала, не кријам имот, ниту пари. Сум имала тежок период во животот со семејни трагедии и финансиски загуби, во време на режимот на ДПМНЕ, ама не ме уништивте ни тогаш, а нема ни сега.Наместо да праќате соопштенија и да ја тормозите јавноста, обратете се до МВРО, Финансова полиција, Јавното обвинителство, Управа за финансиско разузнавање и Агенцијата за катастар на недвижности. Сите овие институции се под ваша команда, нека отворат истрага и нека најдат непријавен имот или пари на мое име. Ако најдат ќе ги донирам за потребите на Мицко и фамилијата, да го прошетаат светот на наш трошок.А во меѓувреме јавноста уште чека одговор за:1. По кој критериум синчето на Мицко се најде во владината делегација за Америка?2. Зошто за помошник министер во МВР е поставено лице со активна кривична пријава? 3. Зошто заменик директорката на Агенција за разузнавање е незаконски поставена, со несоодветно работно искуство?4. Зошто за директор на Управата за извршување на санкции поставите лице со несоодведно искуство? За да може да го прикрива бегството на осудените од 27ми април?5. Дали финансискиот пакет со Унгарија е билет за враќање на Груевски во Македонија?6. Дали сте свесни дека со упадот кој го правите во безбедносните служби со поставувње на несоодветен кадар, кои се послушници на подземјето на ДПМНЕ ја загрозувате позицијата на Македонија како НАТО членка?Одговори, не лаги...Македонија чека...”, вели Славјанка Петровска, пратеник на СДСМ.

Македонија | пред 1 година

Петровска: Не глумете опозиција, власт сте

,,Добро утро послушници од ДПМНЕ. Еве веќе 20 дена како и официјално сте власт, па нема потреба од повторувања на прес конференции, ниту да ја повикувате ДКСК. Само за потсетување дека овие обвинувања се одамна, Драган Ковачки лажеше и ме клеветеше. И како што ветив во судска постапка докажав дека е лажго. Ама од срам ја крие пресудата и ве турка во поголема брука.Ај сега еден бесплатлен совет од мене, бидејќи сте власт и МВР повторно е МВРО поведете истрага за наводната хациенда, па пак да "си пукате во нога"Во меѓувреме одговорете:1. Како е можно за помошник министер во МВР да е поставено лице со активна кривична пријава?2. Зошто заменик директорката на Агенција за разузнавање е незаконски поставена?3. ⁠Ќе се извини ли Мицкоски за злоупотреба на позицијата и организирање прошетки на неговиот син во Вашингтон?4. ⁠Како е можно за директор на Управата за извршување на санкции да поставите лица со несоодведно искуство?5. ⁠Кој ви дозволи ја задолжувате државата, односно граѓаните со 500 милиони евра за да ги покриете неспособните градоначалници на ДПМНЕ?Со лаги, клевети и закани нема да ме спречите да ја говорам вистината и да поставувам прашања.Одговорете, не молчите.”, вели Славјанка Петровска, пратеник на СДСМ.

Македонија | пред 1 година

Петровска: Дали за помошник министер во МВР е поставено лице со кривична пријава за измама?

"Дали е точно дека за помошник министер во МВР е поставено лице против кое во 2023 година е поднесена кривична пријава по член 247 од КЗ, Измама."?,,Ова прашање им го поставив на пратеничките и пратениците од ДПМНЕ на седницата на Комисијата за политички систем.Одговор немаше, само обиди да бидам замолчена и заплашена.Не ви се плашам, ќе зборам.п.с до кај сте со Никогаш Северна, само Македонија?”, напиша Славјанка Петровска.

Македонија | пред 1 година

Петровска: Во МВР поделени повеќе од 50 незаконски решенија за распоредување на полициски службеници

,,Во рок од 7 дена во МВР "се поделени", под притисок и закани повеќе од 50 незаконски решенија за распоредување на полициски службеници, дел од нив и на раководни позиции.Во Агенцијата за разузнавање се назначи заменик директорка, без законски потребното работно искуство.Се подготвуваат партиски послушници и во АНБ и Военото разузнавање.И Мицковски најавува нова реформа на безбедносните служби и нивното спојување?Не, тоа ќе биде полициско партиска држава со концентрација на моќ кај некој нов Горан Грујовски.”, напиша Славјанка Петровска на својот Фејсбук профил.

Македонија | пред 1 година

Петровска: Нема да прифатам никаква функција во СДСМ, но и никој нема да ме замолчи

Во интервју за Телевизија 24 пратеничката Славјанка Петровска кажа дека секогаш гласно ќе зборува за проблемите во СДСМ, но и дека нема да орифати никаква функција во раководството на партија.„Нема да прифатам никаква функција. Нема да бидам причина за неуспесите на СДСМ, ама преку какви било обвинувања некој се обиде да ме замолчи и за сметка на тоа да продолжат некои внатрешни игри, што му штетат на СДСМ и кои следната година ќе направат полош резултат, тогаш нема да има цена што ќе може мене да ме замолчи, па дури и да е критика, па дури и да биде побарана оставка од мене како пратеник. Јас немам проблем да сносам одговорност, но ако јас треба да бидам замолчена само затоа што јавно зборувам за прашања што мислам дека не треба да се случуваат во СДСМ, тогаш се потврдува мојата теза за заробена партија“ рече Петровска.Петровска ги објасни причините и мотивите за нејзиното повелкување од изборите за претседател на СДСМ.„Во последната недела од кампањата, се случуваа работи и стигнуваа информации од членовите низ државата, дека целиот тој процес за кој сите се залагавме да биде фер и демократски, ќе појави одредени аномалии што ќе фрлат дамка на изборите. Дополнително, и малиот број на активно регистрирани членови за гласање, укажуваше на тоа дека СДСМ се наоѓа во дополнително комплицирана и тешка ситуација. Тоа плус оние информации што ги наведов при повлекувањето, а особено оние неправилности за кои не сакам јавно да зборувам, ги наведов лично пред членовите на Централната изборна комисија. Кога влегувате во еден процес, а факт е дека СДСМ го има единствениот ваков процес на избор на претседател и кога ова е трет пат вака да бирате претседател, тогаш сето она што се јавувало како пропуст, требало да биде надминато. Повторувањето на тие пропусти, покажа дека за жал ние не сме научиле од пропустите“ рече Петровска.Таа додаде дека сакала и понатаму да биде дел од процесот кој има сенка и затоа ја донела одлуката чесно да го каже својот став.Петровска посочи и дека на списокот на активно регистрирани гласачи имало и членови на други политички партии.„На списоците имаше членови на други полиитчки партии како ЗНАМ и ВМРО-ДПМНЕ, односно кои на последните избори во 2024 година работеа за тие партии“ посочи Петровска.

Македонија | пред 1 година

(Видео) Славјанка Петровска: Носам помала одговорност, за разлика од потенцијални кандидати за претседател на СДСМ

Пратеничката од СДСМ и ексминистерка за одбрана, Славјанка Петровска, ексклузивно во „Претрес со Ландов“, откри дека влегува во трката за наследник на Димитар Ковачевски. Таа беше носител во шестата изборна единица каде СДСМ имаше историски најлош резултат, истовремено имаше и партиска функција – претседавач со Централниот одбор.?t=1265„Како член на СДСМ, чувствувам одговорност за секој пораз, исто како и како што се чувствувам горда кога има победа“, рече Петровска во „Претрес со Ландов“, па одговараше и дали мисли на Венко Филипче, Петре Шилегов, Јован Деспотовски како потенцијални противкандидати.Прашана зошто се кандидира за претседателка наспроти лошиот резултат кој го донела, одговори: „Јас слободно би рекла дека носам помала одговорност, ако ја мериме, за разлика од некои од носителите на функции кои подолго време биле носители на државни функции, а потенцијално се кандидати“.Во подкастот „Претрс“ одговараше и на други прашања како што се теновите и хеликоптерите дадени на Украина, критиките од партиските другари дека молчела во Собрание, дали СДСМ е секта или партија, се плаши ли од затвор, за замерките од граѓаните, но и за приватни моменти.

Македонија | пред 1 година

Ковачки до Петровска: Дали приведените припадници на военото разузнавање истражуваа шверц на роба од страна на припадниците кои се на мисија во Косово?

Министерката за одбрана Славјанка Петровска ги отфрли тврдењата на пратеникот Драган Ковачки од ВМРО-ДПМНЕ дека припадници на военото разузнавање биле упасени на Косово.На гостувањето во емисијата „360 степени“ на Алсат телевизија, Петровска рече дека ова е уште една од низата на лаги со кои што тој се служи и најави дека е можно да поднесе тужба против него.– Голема е веројатноста дека и за ова негово тврдење дека биле уапсени припадници на военото разузнавање, испратени од моја страна, ќе добие уште една тужба заради тоа што мислам дека најдобро е да ги соочиме аргументите наместо вакви празни постови исполнети со лаги, рече Петровска.Драган Ковачки објави статус на социјалните мрежи во кој вели дека министерката се обидела за го дискредитира.„Почитувана министерке за одбрана, го изгледав Вашето интервју на 360 степени, па чувствувам должност да одговорам:Прво, за обидите за моја лична дискредирација: Не се сметам за министер за одбрана во сенка. Јас сум пратеник во Собранието на РМ, а колку сум успешен ќе ценат граѓаните, не Вие.Вие сте дел од извршната власт и треба да одговарате пред нас пратениците, а не обратно.Второ, за тоа дека сигурна во Вашето тврдење дека станува збор за измислен настан со приведувањето на оперативците, станете и кажете и' на македонската јавност зошто криете и дали приведените припадници на военото разузнавање биле да истражуваат повеќегодишна појава на шверц на акцизна и друга роба од страна на припадниците кои се на мисија во Косово?Кој ги селектираше и ги прати тие лица на Косово, Вие или некој друг?До толку сте неспособни што поради партиско-криминални интереси дозволивте да се изгуби авторитетот во одбраната и секој да прави што сака и за тоа да не одговара. Сега откако цела АРМ знае за недозволените активности, решивте да ја ангажирате воената служба за безбедност да Ви на покрива Вашата неспособност.Зошто барате да Ви го покажам документот дека двајца оперативци кои биле пратени на Косово и дека биле приведени заради сомнителни активности, кога и сама знаете дека документот е класифициран и јас не би можел да го поседувам бидејќи вашите служби напишале дека сум бил НЕПОДОБЕН за безбедноста на државата.Трето, станете и кажете колку време знаете за оваа појава и зошто сте неспособни да ја сузбиете истата и зошто тие што требало тоа да го сузбијат ги наградивте со девизни плати? Дали затоа што ги злоупотребивте и наместо да се борат со криминалот, вие успешно ги насочивте кон ВМРО-ДПМНЕ?До каде отиде Вашата забеганост, да барате информации за тоа кој во каква облека спортува на кејот на Вардар?Брука.Се срамам што сум дел од времето во кое се распаѓа македонската одбрана под егзибиционизмот на Шекеринска и Славјанка Петровска.** Делот од Вашето интервју каде ја објаснувате борбената готовност на АРМ нема да го коментирам, нека Ве ценат Вашите потчинети“, стои во објавата.

Коментари | пред 3 години

Експлозија се случила покрај Славјанка Петровска на булевар во Скопје

Вечерва експлодира Автомобил на булеварот Кочо Рацин во близина на гимназијата Корчагин.Во близина се движела министерката за одбрана Славјанка Петровска која го забелажала настанот„Одев пешки од спротивната страна на булеварот и во тој момент експлодираше возилото. Нема никаква врска со мене и колку што знам нема повредени, возачот на возилото е добар“, вели Петровска.На терен е испратена и увидна екипа на МВР.

Скопје | пред 3 години

Петровска го крши Законот за одбрана и ги изложува мисиите, а со тоа и припадниците на АРМ на дополнителен ризик, вели Ковачки

Помина цел месец откако јавно обелоденивме дека Министерката за одбрана давала плата на лица со трајна или времена ограниченост за воен рок, дека за заминување на мисија се дава мито, дека на лица кои не ги исполнуваат условите и критеримите Министерката им засновала работен однос во МО како подофицери и сега истите треба да им бидат претпоставени на лица кои ГИ исполнувале условите, ама ним работниот однос им останал под договор, вели Драган Ковачки од ВМРО-ДПМНЕ„Значи, јавно посочивме криминал и корупција во редовите на МО и директно посочивме дека имаме сериозни сомнежи, но и докази кои и' беа отстапени на Министерката за одбрана, но досега не видовме никакви преземени активности од страна на надлежните институции.Случаите беа чисти и требаше веднаш да се постапи.Но, наместо со сериозност да се пристапеше кон изнесените факти, Министерката за одбрана си продолжи со вродениот СДС-овски инает и продолжи да ги крши законите, да ги омаловажува офицерите и подофицерите и да стимулира корупција во редовите на МО.Само за пример, на мисии во странство кои ги плаќаат граѓаните, наместо истата да се корегираше после изнесените факти од наша страна, министерката не реагираше и во мисии си испратила лица:- подофицери на војнички места,- котлари на место стрелци,- експерти за муниција на место болничари.Значи, ја надмина дури и претходната Министерка која пак упатуваше лица без дообука за теренски возила на место возачи.Ваков аматеризам со упад во формациските состави на единиците од страна на цивили кои не разбираат што значи војничка хиерархија и потреба од секоја специјалност токму така како што е пропишано, немам видено.Министерке Славјанка Петровска, има причина зошто во една единица имате командир, заменик, стрелци, снајперисти, болничари итн.Тоа што го правеа и се' уште го прават кадрите на СДС и ДУИ не може да се оправда и заслужува осуда од плаќачите на даноци - граѓаните на Македонија.Еве недај Боже да затреба болничар на единицата, кој ќе ја врши таа улога, муницијашот ли?Колку пати треба ова да повториме за да насадените од СДС сфатат дека војската не смее да биде ничија играчка, затоа што си играат со човечки животи?Славјанка Петровска со нејзините постапки го крши Законот за одбрана и ги изложува мисиите, а со тоа и припадниците на АРМ на дополнителен ризик.Од кои причини, самата треба да и' објасни на македонската јавност“, се вели во соопштението.

Македонија | пред 3 години

Според СДСМ Славјанка Петровска во исто време е и министер и пратеник, вели ВМРО-ДПМНЕ

Според СДСМ Славјанка Петровска во исто време е и министер и пратеник, вели ВМРО-ДПМНЕ„На веб страницата на СДСМ во делот на пратеничка група, Славјанка Петровска е составен дел од пратеничката група, иако таа повеќе од половина година е министер за одбрана.Според СДСМ Петровска е и министер и пратеник.Ова ја отсликува реалноста во власта. СДСМ и на Извршната власт и на Законодавната власт гледа како на едно исто, односно Собранието за нив е само извршител на владата.Предавникот Ковачевски и неговите ментори носат одлука, а пратениците на СДСМ се само гласачка машина“; се вели во соопштението.

Македонија | пред 3 години