Времето во Македонија денеска ќе биде сончево со умерена облачност и со умерен, а долж Повардарието повремено засилен ветер од југоисточен правец, кој на моменти ќе надминува 60 километри на час.
Минималната температура ќе се движи од 4 до 10 степени, додека максималната ќе достигне меѓу 15 и 21 степен.
Во Скопје се очекува слично време – сончево со умерена облачност и умерен до засилен југоисточен ветер. Температурата ќе се движи од минимални 8 до максимални 20 степени.
Според прогнозата на Управата за хидрометеоролошки работи, од вторник следува период на променливо облачно време со повремени локални врнежи од дожд. На одделни места врнежите ќе бидат пообилни, а во четврток се очекуваат услови и за изолирана појава на грмежи.
Југоисточниот ветер ќе остане засилен, особено во вторник долж Повардарието, каде ќе достигнува брзина над 60 километри на час.
Кон крајот на неделата, во петок и сабота, се очекува стабилизирање на времето со претежно сончеви периоди и слаб до умерен ветер од северен правец.
