Индија во блиска иднина нема да набавува нови руски борбени авиони од семејството „Сухој“, вклучително и моделот Су-57, изјави секретарот на индиското Министерство за одбрана, Раџеш Кумар Синг.
Тој посочи дека приоритет на властите е модернизацијата на постојната флота, а не купувањето нови летала. Индија во моментов располага со околу 260 ловци Су-30МКИ, кои се произведуваат по руска лиценца.
„Не размислувавме за набавка на нови авиони „Сухој“. Активно работиме на модернизација на постојните летала што ги произведуваме по руска лиценца“, изјави Синг.
Според порталот Defence Security Asia, Русија претходно ѝ понудила на Индија меѓу 36 и 40 авиони Су-57, а рускиот претседател Владимир Путин во јуни изјави дека Москва е подготвена да ги испорача овие ловци на Њу Делхи.
Изјавата на индискиот функционер укажува дека Њу Делхи во овој момент предност им дава на модернизацијата на постојните борбени авиони, додека набавката на нови руски ловци не е дел од краткорочните планови.
