Инфлацијата во Шпанија продолжува да расте и во јули достигна 3,6 отсто, со што петти месец по ред останува над границата од три отсто. Станува збор за највисока стапка од мај 2024 година, покажуваат податоците на Националниот институт за статистика (INE).
Најголем притисок врз растот на цените имаат енергенсите, особено електричната енергија и горивата. На состојбата влијаат и геополитичките тензии, вклучително и ограничувањата во Ормускиот Теснец.
Цената на електричната енергија во јули достигнала околу 105 евра за мегават-час, што е најголем меѓугодишен раст од јули 2022 година. Дополнителен притисок создава и зголемената потрошувачка на електрична енергија поради топлотните бранови.
Шпанската влада во меѓувреме активирала автоматско намалување на данокот на горивата. Мерката е донесена откако меѓугодишниот раст на цената на дизелот надминал 15 отсто. Даночното оптоварување ќе се намали за 20 центи по литар, наместо досегашните пет центи.
Мерката, која е дел од владиниот план за справување со последиците од кризата предизвикана од нападите врз Иран, наиде на критики од левичарските партии, кои тврдат дека дистрибутерите не го пренесуваат целосниот попуст до потрошувачите.
Од друга страна, растот на цените на храната забавува. Во јули меѓугодишната стапка изнесувала 1,6 отсто, што е за 0,3 процентни поени помалку од јуни и најниско ниво од 2021 година.
Во текот на месецот поевтиниле овошјето, зеленчукот и мешунките, а пониски биле и цените на облеката и обувките поради сезонските попусти.
Според официјалните податоци, состојбата со економијата, заедно со станбеното прашање, останува меѓу најголемите грижи за граѓаните на Шпанија.
