Инспекции низ цела држава: Под лупа јајцата, боите и месото пред велигденските празници

Во пресрет на велигденските празници и зголемената побарувачка на јајца, бои за јајца, месо и други прехранбени производи, Агенција за храна и ветеринарство спроведува засилени контроли кај операторите со храна низ целата држава.

— реклама —

Контролите ги опфаќаат сите сегменти од синџирот на храна – од производство и преработка, до дистрибуција и продажба, со цел да се спречи пласирање на небезбедни производи и да се сузбие нелегалната трговија.

— реклама —

Инспекторите за храна и официјалните ветеринари на терен детално проверуваат дали се исполнуваат сите услови за безбедност. Посебен акцент е ставен на јајцата и боите за јајца, каде освен условите за складирање и означување, се вршат и засилени контроли при увоз, при што секоја пратка подлежи на физички преглед на местото на истовар.

— реклама —

Со засилен надзор се опфатени маркети, угостителски објекти, специјализирани продавници, увозници, месарници и зелените пазари.

Од Агенцијата посочуваат дека со овие активности превентивно се делува за граѓаните да имаат сигурен пристап до безбедни и квалитетни производи за празничната трпеза, апелирајќи храната да се купува исклучиво од одобрени и регистрирани оператори кои се под нивна контрола.