Ирак одобри до 40 летови дневно на ирански авиокомпании до меѓународниот аеродром во Наџаф и назад, со што се олеснуваат воздушните врски меѓу двете земји.
Договорот, објавен во петокот, не се однесува на иранската авиокомпанија „Махан ер“, по барање на американската страна.
Шефот на ирачката Управа за цивилно воздухопловство, Али ал-Заиди, позитивно го оцени одговорот на американската влада на напорите на Ирак и ја истакна нејзината соработка при одобрувањето на исклучокот за „Махан ер“.
Според него, мерката ќе го олесни патувањето, особено за пациентите, верските аџии и туристите.
„Воздушниот сообраќај не е само превоз меѓу два аеродрома, туку мост на комуникација меѓу луѓето“, изјави ал-Заиди.
Тој додаде дека Ирак ги гради своите надворешни односи врз основа на интересите на својот народ и се стреми кон урамнотежени и позитивни односи со различни држави.
Одлуката е објавена еден ден откако Иран побара од Ирак да ги укине ограничувањата за летовите меѓу двете земји. Од Техеран порачаа дека мерките создаваат потешкотии за аџиите, пациентите, студентите и деловните луѓе.
Иранските власти за ограничувањата ги обвинија американските санкции и побараа од Багдад да преземе чекори за обновување на редовните воздушни врски.
„Махан ер“ е приватна иранска авиокомпанија која е под американски санкции од 2011 година. Американското Министерство за финансии воведе санкции против превозникот со образложение дека обезбедувал финансиска, материјална и технолошка поддршка на иранската Исламска револуционерна гарда, односно на нејзините сили „Кудс“.
