Иран и Оман постигнаа договор за географскиот правец по кој бродовите би требало да пловат низ Ормускиот Теснец, соопшти иранското Министерство за надворешни работи.
Портпаролот на Министерството, Есмаил Багаеи, изјави дека двете земји подготвуваат заедничко соопштение кое ќе ги опфати техничките, правните, безбедносните и еколошките аспекти на договорот.
„Доколку одредени трети страни не го попречуваат процесот, се финализира заедничко соопштение во кое ќе бидат наведени главните договорени точки“, рече Багаеи, алудирајќи на Соединетите Американски Држави.
Главното несогласување останува барањето на Техеран бродовите да плаќаат надомест за премин низ Ормускиот Теснец. Иран тврди дека има суверено право над дел од пловниот пат, додека САД и земјите од Персискиот Залив инсистираат на слободна пловидба во согласност со меѓународното право.
Оман претходно предложил решение според кое Иран би можел да наплатува доброволни надоместоци за поморски и безбедносни услуги, а двете држави уште во јуни формираа заедничка работна група за управување со пловидбата низ теснецот.
Во меѓувреме, американскиот претседател Доналд Трамп изјави дека САД учествуваат во разговорите и дека преговорите „се движат многу добро“.
„Ормускиот Теснец многу брзо ќе биде отворен или ќе има сериозни последици, а потоа ќе биде отворен“, изјави Трамп, додавајќи дека договор би можел да биде објавен во наредните неколку дена.
Сепак, Техеран тврди дека разговорите со Оман немаат никаква врска со САД, иако ги претставува како продолжение на меморандумот потпишан со Вашингтон во јуни.
Ормускиот Теснец, преку кој пред почетокот на конфликтот минуваше околу една петтина од светската трговија со нафта и течен природен гас, веќе со месеци е речиси затворен за комерцијален поморски сообраќај.
