Иран најавува воведување такси за комерцијалните бродови што минуваат низ Ормускиот Теснец, соопшти Министерството за надворешни работи во Техеран.
Портпаролот на иранското МНР, Есмаил Багеи, изјави дека Иран заедно со Оман работи на механизми поврзани со безбедноста на пловидбата, заштитата на животната средина и борбата против криминалот на море.
Според Багеи, таксите и надоместоците ќе се наплаќаат за поморските услуги што ќе им бидат обезбедени на бродовите.
Прашањето за транзитот низ Ормускиот Теснец, една од клучните светски рути за транспорт на нафта и гас, е меѓу главните точки на спорот меѓу Иран и САД. Пред почетокот на војната на 28 февруари, пловидбата низ теснецот во голема мера се одвиваше непречено и без транзитни такси.
Ормускиот Теснец, на најтесниот дел, е широк околу 39 километри. Иран и Оман полагаат право на територијални води до 12 наутички милји од своите брегови, поради што во теснецот нема меѓународни води, според толкувањето наведено во информацијата.
Од друга страна, Конвенцијата на ОН за правото на морето гарантира право на транзитен премин и забранува блокирање на комерцијалните бродови, но Иран не го прифаќа таквото правно толкување.
Американскиот потпретседател Џеј Ди Венс вчера изјави дека целта на Вашингтон е да се врати транзитот на нафта и гас низ Ормускиот Теснец на нивото пред војната.
Багеи се осврна и на изјавата на американскиот претседател Доналд Трамп дека Вашингтон и Техеран се вовлечени во „шаховска партија“.
„Без разлика дали зад сцената или пред рефлекторите, Иранците се докажаа како професионални шахисти“, изјави портпаролот на иранското МНР.
