Иран наводно купува кинески системи за противвоздушна одбрана, Пекинг ги негира тврдењата

Иран во наредните недели би требало да ја добие првата испорака од неколку стотици кинески преносливи системи за противвоздушна одбрана (MANPADS), тврдат три извори запознаени со договорот, на кои се повикува агенцијата Ројтерс.

Според истите извори, Техеран склучил договор за набавка на меѓу 300 и 400 преносливи противвоздушни системи, меѓу кои се и кинеските ракети QW-12 и FN-16. Вредноста на договорот се проценува на 60 до 70 милиони долари.

— реклама —

Наводно, договорот бил склучен преку компанијата „Zhongqing Baoshang International Investment“ од Хонг Конг, која посредувала меѓу иранската страна и кинескиот производител.

— реклама —

Кинеското Министерство за надворешни работи ги демантираше овие информации, оценувајќи дека извештаите се „целосно неосновани“, и повтори дека Кина се залага за мирно решавање на конфликтите. Ниту иранското Министерство за надворешни работи не даде официјален коментар.

— реклама —

Според изворите, првите испораки би требало да започнат по воздушен пат од кинескиот град Урумчи, а потоа опремата да биде транспортирана преку Пакистан до Иран. Пакистанските власти, пак, ги отфрлија шпекулациите дека учествуваат во испораката на кинеско оружје за Иран.

Воените аналитичари посочуваат дека преносливите противвоздушни системи се особено ефикасни поради нивната мобилност и можноста брзо да се распоредуваат на терен. Ракетите QW-12 и FN-16 користат инфрацрвено наведување и се наменети за соборување нисколетечки авиони, хеликоптери и беспилотни летала.

Наводната набавка следува по неодамнешните напади врз ирански воени капацитети, кои, според аналитичарите, ги открија слабостите на иранската противвоздушна одбрана.