Иран објави нова мапа на Ормутскиот Теснец, за која тврди дека го прикажува ова стратешки важно поморско подрачје под негова контрола.
Техеран го стави Ормутскиот Теснец под строга блокада уште од крајот на февруари, по нападите на Соединетите Американски Држави и Израел врз Иран. Блокадата на овој клучен поморски коридор, низ кој порано минуваше околу една петтина од светската нафта, предизвика голем раст на цените на нафтата, гасот и енергенсите низ светот.
И покрај меѓународните притисоци, иранските власти не покажуваат намера да ја намалат контролата врз теснецот.
Иранската Управа за Персискиот Залив, формирана овој месец за надзор на поморскиот сообраќај, соопшти дека регионот сега е под „надзор“ на иранските вооружени сили.
Според објавените информации, зоната што Иран ја смета за под своја контрола зафаќа околу 8.800 квадратни милји и навлегува во територијалните води на Оман и Обединетите Арапски Емирати.
Иранските власти порачаа дека секој транзит низ ова подрачје мора да биде координиран и одобрен од нивната администрација.
Американскиот државен секретар Марко Рубио остро ги осуди потезите на Техеран, обвинувајќи го Иран дека се обидува да воспостави „систем за наплата на патарина“ во Ормутскиот Теснец.
„Ниту една држава во светот не треба да го прифати тоа“, изјави Рубио, оценувајќи ја идејата како „неприфатлива“.
Тој додаде дека, и покрај новите тензии, е забележан „мал напредок“ во разговорите поврзани со ситуацијата околу теснецот.
Во меѓувреме, висок функционер од Обединетите Арапски Емирати, Анвар Гаргаш, изјави дека шансите за договор меѓу САД и Иран за деблокада на Ормускиот Теснец се „50-50“.
Гаргаш предупреди дека теснецот мора да се врати во нормален режим и повторно да стане меѓународен пловен пат.
„Иранската нуклеарна програма порано ни беше втора или трета грижа, а сега е прва. Видовме дека Иран е подготвен да употреби какво било оружје што го има“, изјави тој на форумот GLOBSEC во Прага.
