Иран: Ормускиот Теснец може да биде отворен за неколку дена ако САД ја укинат блокадата

Висок ирански претставник изјави за Ројтерс дека Иран би можел повторно да го отвори Ормускиот Теснец во рок од неколку дена доколку САД ја укинат блокадата. Тој Генералното собрание на Обединетите нации го опиша како „златна можност“ за обновување на дипломатијата меѓу Техеран и Вашингтон.

Американскиот претседател Доналд Трамп и иранскиот претседател Масуд Пезешкијан ќе присуствуваат на Генералното собрание на ОН во Њујорк, што ќе биде првпат да се најдат на ист настан откако Трамп во февруари ја започна операцијата „Епски бес“ против Иран.

— реклама —

Иранскиот претставник посочи дека иранската делегација има целосно овластување за обновување на преговорите, но дека засега не се планирани директни средби меѓу двајцата претседатели.

Директни средби меѓу Иран и САД немало од јули, кога пропадна привремениот договор за прекин на војната, само неколку недели откако Трамп и Пезешкијан го потпишаа. Според иранскиот претставник, Вашингтон треба јавно да потврди дека сака прашањето да го реши по дипломатски пат, а потоа да се договори временска рамка за продолжување на процесот.

„Генералното собрание на ОН е златна можност за САД да се вратат на дипломатијата“, изјавил тој, додавајќи дека Иран преку посредници на 16 септември го испратил својот најнов предлог до Вашингтон.

— реклама —

Американскиот државен секретар Марко Рубио изјави за Ен-Би-Си дека САД се отворени за разговори со Иран за време на Генералното собрание, особено доколку тие би можеле да доведат до позитивен исход и исполнување на целта на американската политика.

Трамп во вторник треба да се сретне со лидерите на шест арапски држави од Персискиот Залив – Бахреин, Кувајт, Катар, Оман, Саудиска Арабија и Обединетите Арапски Емирати.

— реклама —

Земјите од Заливот сакаат повторно да се воспостави поморскиот сообраќај низ Ормускиот Теснец, но истовремено не сакаат Иран да добие преголемо влијание. Сите, освен Оман, на своја територија имаат големи американски воени бази, кои Иран во повеќе наврати ги напаѓал за време на конфликтот.

Во меѓувреме, цената на нафтата во вторникот благо падна откако извори за Ројтерс соопштија дека Саудиска Арабија повторно го активирала својот нафтовод што го поврзува источниот и западниот дел на земјата. Според истите извори, земјата би можела повторно да започне со извоз преку пристаништето Јанбу на Црвеното Море во рок од неколку часа, но во помали количества од претходно.

Нафтоводот претставува главна саудиска алтернатива за извоз на нафта откако Ормускиот Теснец речиси целосно беше затворен. Тој беше ставен надвор од употреба по нападите на 10 септември, за кои Ријад ги обвини проиранските сојузници во Ирак.

Хутите во меѓувреме ги потиснаа владините сили во Јемен со цел да воспостават контрола врз преминот Баб ел-Мандеб, а извршија и директни напади врз Саудиска Арабија со балистички ракети и беспилотни летала.

САД, кои минатата година два месеца ги бомбардираа хутите, досега ги одбиваа повеќекратните барања на саудискиот престолонаследник Мохамед бин Салман да се вклучат во борбата против оваа група. „Њујорк тајмс“ објави дека Трамп во последен момент во неделата ги откажал американските напади врз хутите.