Иран предупредува на нова голема војна, Трамп очекува брз договор

Додека воените судири на Блискиот Исток повторно се интензивираат, иранските власти соопштија дека нема конкретен напредок во разговорите со Соединетите Американски Држави за намалување на тензиите и прекин на конфликтите во регионот.

Иранскиот министер за надворешни работи, Абас Арагчи, изјави дека меѓу двете страни биле разменети пораки во врска со состојбата во Либан, но оти преговорите засега не донеле конкретни резултати.

— реклама —

„Разменети се пораки за потребата од запирање на агресијата врз Бејрут, но во преговарачкиот процес нема остварено никаков конкретен напредок“, изјави Арагчи.

Тој предупреди дека евентуален напад врз либанската престолнина би можел да предизвика нова војна од големи размери во регионот.

— реклама —

Од друга страна, американскиот претседател Доналд Трамп изрази оптимизам околу текот на разговорите.

„Ми велат дека преговорите одат многу добро. Можеби сè ќе биде завршено уште овој викенд“, изјави Трамп.

Во меѓувреме, американскиот државен секретар Марко Рубио потврди дека во разговорите се разгледува и прашањето за збогатениот ураниум, иако, според Вашингтон, Техеран сè уште нема дадено конечен одговор.

— реклама —

Паралелно со дипломатските напори, конфликтот дополнително се прошири во Персискиот Залив. Кувајт го обвини Иран за напад со дронови и ракети врз аеродром, при што загинало едно лице, а десетици биле повредени.

Како одговор, американската Централна команда извршила воздушни напади врз иранскиот остров Кешм, по што следувале ирански ракетни напади врз воени цели во Кувајт и Бахреин.

Во исто време продолжуваат и судирите на либанскиот фронт. Во најновите израелски воздушни напади, според локални извори, загинале девет лица, додека Хезболах презеде одговорност за нови ракетни и беспилотни напади кон северен Израел.

Ескалацијата на конфликтот дополнително влијаеше и врз енергетските пазари, при што цената на нафтата се доближи до 100 долари за барел поради стравувањата од нарушување на снабдувањето од регионот.