Иран со нова закана до САД и Израел: „Црвените линии се минато“

Иранскиот врховен лидер наредил вооружените сили веднаш и одлучно да одговорат на секоја закана, со цел да се спречат можни напади врз земјата, објавија иранските медиуми. По средбата со воените команданти, тој порача дека Иран нема да има „географски ограничувања“ во своите воени дејствија и дека самиот ќе одлучи кога и под кои услови ќе заврши конфликтот со САД.

Тој наредил и ажурирање на списокот на можни воени цели, на кој треба да бидат вклучени сите материјални и нематеријални средства на САД и Израел што се во дострел на иранските вооружени сили.

— реклама —

Заканите од Техеран следуваат по извештаите дека американскиот претседател Доналд Трамп одржал средба со адмиралот Бред Купер, командант на Централната команда на САД (ЦЕНТКОМ), задолжена за американските воени операции на Блискиот Исток. Според „Волстрит џурнал“, средбата би можела да укажува на подготовка на нова голема американска воена операција против Иран.

— реклама —

Иранскиот министер за надворешни работи Абас Арагчи претходно се закани со силни воени напади како одговор на секој нов напад врз иранскиот народ. Тој реагираше на изјавите на германскиот канцелар Фридрих Мерц, кој за време на посетата на Јужна Кореја повика на што побрзо завршување на војната со Иран.

Мерц предупреди дека само поради зголемувањето на цените на енергенсите Европа веќе претрпела трошоци од повеќе од 100 милијарди евра. Арагчи одговори дека таа сума е незначителна во споредба со силниот одговор што иранската војска ќе му го зададе на секој што ќе се осмели да го нападне Иран.

— реклама —

„Црвените линии се минато“, порача Арагчи на социјалната мрежа Икс.

Неговата реакција се однесуваше и на изјавата на Мерц од 17 јуни 2025 година, кога германскиот канцелар ги пофали израелските напади врз Иран, оценувајќи дека Израел ја врши „валканата работа за сите нас“. Мерц тогаш изјави дека го почитува храброто постапување на Израел и предупреди дека без таквите напади светот би можел со месеци или години да биде изложен на заканите од Техеран.

Изјавата предизвика критики, но Мерц подоцна не ги повлече своите зборови, наведувајќи дека така ја опишал ситуацијата и дека истото можело да се каже и на поинаков начин.