Иранската новинска агенција „Фарс“, повикувајќи се на неименуван извор запознаен со преговорите, објави дека Техеран во последен момент внел измена во рамковниот договор со САД, со која било нагласено прашањето за суверенитетот над Ормускиот теснец и наплатата на поморски услуги.
Според агенцијата, која важи за блиска до иранските безбедносни структури, непосредно пред објавувањето на меморандумот за разбирање бил изменет текстот за „јасно и изречно да се нагласи прашањето за иранско-оманскиот суверенитет над Ормускиот теснец“.
„Во последните моменти од преговорите текстот на меморандумот беше изменет за јасно и недвосмислено да се истакне прашањето за иранско-оманскиот суверенитет над Ормускиот теснец“, објави „Фарс“.
Агенцијата наведува дека употребата на терминот „поморски услуги“ значи дека Соединетите Американски Држави прифатиле Иран да наплатува одредени надоместоци за користењето на теснецот.
„Оваа формулација значи дека САД прифатиле плаќање такси кон Иран“, се додава во објавата.
Засега нема официјална реакција од Вашингтон во врска со овие тврдења. Американскиот претседател Доналд Трамп претходно изјави дека договорот гарантира оти Ормускиот теснец ќе биде „трајно без наплата“, што отвора можност за различни толкувања на содржината на постигнатиот договор.
Ормускиот теснец е една од најважните светски поморски рути за транспорт на нафта и гас, а секоја промена во режимот на неговото користење има значително влијание врз глобалната економија и енергетските пазари.
