Иран во моментов не води никакви разговори со Соединетите Американски Држави за деталите поврзани со својата нуклеарна програма, изјави портпаролот на иранското Министерство за надворешни работи, Есмаил Багаеи.
На редовната неделна прес-конференција, Багаеи нагласи дека за Техеран во оваа фаза постои само еден приоритет – прекин на воените дејствија.
„Ние добро знаеме кога е потребно да се дејствува по прашањата поврзани со нуклеарната програма. Во моментов не се водат никакви преговори за деталите од нуклеарните активности. Во оваа фаза нашиот единствен и апсолутен приоритет е запирање на војната“, изјави Багаеи.
Неговата изјава доаѓа во период на зголемени тензии меѓу Иран и САД, додека дипломатските напори за стабилизација на ситуацијата во регионот сè уште не даваат конкретни резултати.
