Апелацискиот суд во Иран ја потврдил казната од 74 удари со камшик за познатата пејачка Парасту Ахмади поради настап без задолжителен хиџаб, соопштија нејзините адвокати.
Ахмади во декември 2024 година одржала концерт облечена во фустан без ракави, а настапот во живо го пренесувала на својот канал на Јутјуб. По објавувањето на снимката, која за кратко време станала вирална и собрала милиони прегледи, иранските власти покренале постапка против 29-годишната пејачка.
Иранските власти тогаш соопштиле дека настапот бил спротивен на законските и културните прописи во земјата.
Кривичниот суд во Ком во јуни ја прогласил Ахмади и уште осум членови на нејзиниот бенд и продукцискиот тим за виновни по обвиненија, меѓу кои и „нарушување на јавниот морал“ преку објавување „непристојна содржина“. Покрај 74-те удари со камшик, на обвинетите им било забрането две години да се занимаваат со аудиовизуелни активности и да ја напуштаат земјата.
Адвокатите на Ахмади велат дека Апелацискиот суд ја одбил жалбата без одржување рочиште. Тие оценуваат дека одржувањето на концертот не претставувало кривично дело и дека првостепениот суд изрекол една од најстрогите можни казни.
Пресудата предизвикала бројни реакции на социјалните мрежи, а ја осудиле и организации за човекови права. „Амнести интернешенел“ предупредил дека камшикувањето претставува сурово, нечовечко и понижувачко казнување.
Според иранските закони, жените и девојчињата кои достигнале пубертет мора да ја покриваат косата со хиџаб и да носат широка облека што го покрива телото.
Случајот на Ахмади доаѓа по протестите што го потресоа Иран по смртта на Махса Амини во притвор во 2022 година, откако била приведена поради наводно неправилно носење хиџаб. Оттогаш, дел од жените и девојките во земјата продолжуваат јавно да ги прекршуваат правилата за облекување, додека властите одговараат со апсења, предупредувања и други мерки.
