Иранските вооружени сили се подготвени за евентуални нови американски напади, изјави во неделата воениот портпарол Мохамад Акрамнија, пренесоа иранските државни медиуми. Неговата изјава уследи откако американскиот претседател Доналд Трамп соопшти дека го одбил предлогот од Техеран за повторно отворање на Ормускиот Теснец и прекин на конфликтот.
Акрамнија порача дека иранската армија е целосно подготвена за евентуален судир и предупреди дека САД би претрпеле уште поголема штета доколку повторно го нападнат Иран.
Во одвоено обраќање, врховниот командант на иранската армија, Амир Хатами, оцени дека војната се наоѓа во критична и одлучувачка фаза. Тој порача дека Техеран нема да прифати ситуација во која на Иран му е оневозможена трговијата, додека странски сили ги користат стратешките поморски патишта во регионот.
„Ако Иран не може да тргува, ако Иран не може да живее, никој нема да може ниту да тргува ниту да живее“, порача Хатами, додавајќи дека Ормускиот Теснец за Иран претставува прашање на достоинство и чест.
Според него, Иран нема да дозволи неговите противници да ја користат оваа клучна стратешка точка додека иранскиот народ е лишен од можноста за нормално функционирање.
