Иранскиот шеф на дипломатијата го опиша ударот во кој беше убиен врховниот водач

Иранскиот министер за надворешни работи Абас Арагчи тврди дека бил затрупан под урнатините на комплексот во кој се наоѓало државното раководство за време на американско-израелскиот воздушен напад, во кој, според неговите наводи, првиот ден од војната загинал врховниот лидер Али Хамнеи.

Во интервју за ирански медиум, Арагчи изјави дека Израел и САД располагале со прецизни разузнавачки информации за локацијата на врвните ирански функционери, што, според него, им овозможило да ги погодат клучните државни институции.

— реклама —

Тој рече дека во моментот на нападот се наоѓал на состанок со заменик-шефот на кабинетот на врховниот лидер, кога зградата била погодена од неколку силни експлозии.

„Бевме на другата страна од зградата. По експлозијата, таванот и ѕидовите се урнаа врз нас. Го фатив за рака и се пробивавме низ гредите и урнатините додека слушавме повици за помош“, изјави Арагчи.

— реклама —

Тој тврди дека три дена иранското државно раководство било целосно отсечено од комуникација и се обидувало да утврди кои функционери преживеале.

Арагчи, исто така, изјави дека уште од почетокот бил скептичен дека преговорите меѓу Иран и САД за нуклеарната програма ќе успеат, но сметал дека е важно да продолжат за да покаже Техеран дека се обидел спорот да го реши по дипломатски пат.

Според него, непосредно пред почетокот на нападите, министерот за надворешни работи на Оман му пренел дека во Вашингтон нагло се променило расположението и дека американската администрација станала многу понаклонета кон воена опција.

— реклама —

Иранскиот министер понатаму тврди дека земјата однапред подготвила планови за затворање на Ормускиот Теснец доколку врховниот лидер стане цел на напад, како и дека Техеран ги предупредил соседните држави дека секој напад врз Иран ќе биде проследен со одговор против американските бази во регионот и енергетската инфраструктура.

Тој додаде дека, по 12-дневната израелска кампања во 2025 година, Иран значително ги подобрил своите ракетни капацитети и го намалил времето потребно за повторно ставање во функција на ракетните бази по евентуален напад.

— реклама —

„Не водиме војна освен кога цената на невојувањето е поголема од цената на војната“, изјави Арагчи.

Во текстот се работи за тврдења на иранскиот министер, кои не се независно потврдени.