Истрагата се проширува: Седум нови осомничени за шверц на марихуана од Македонија во Србија

Истрагата за организиран транспорт на марихуана од Македонија во Србија се проширува со нови седум осомничени лица, соопшти Основното јавно обвинителство за гонење на организиран криминал и корупција.

Според досега обезбедените докази и меѓународната соработка со српските надлежни органи, постојат индиции за поширок круг лица вклучени во организираната криминална активност. Седумтемина новоосомничени се товарат дека, како припадници на организирана криминална група, го сториле кривичното дело „неовластено производство и пуштање во промет наркотични дроги, психотропни супстанции и прекурсори“.

— реклама —

Истрагата опфаќа период од 2025 година до крајот на јануари 2026 година. Според обвинителството, осомничените имале различни улоги во набавката, транспортот и складирањето на марихуаната, која била пренесувана од Македонија во Србија и била наменета за понатамошна продажба и дистрибуција.

Како параван за незаконските активности било користено правно лице од Скопје, кое имало одобрение за одгледување канабис за медицински цели и дозвола за производство на екстракти од канабис.

— реклама —

Сопствениците на компанијата, од кои едниот бил и управител, според обвинителството, организирале лица од Македонија и Србија за набавка и транспорт на марихуаната. За пренесување на дрогата биле користени товарни возила и царински декларации во кои било наведено дека се превезува текстилна, прехранбена или друга стока.

По преминувањето на границата, марихуаната била складирана во месноста Коњух кај Крушевац, каде што била препакувана и подготвувана за понатамошна продажба.

— реклама —

Според досега обезбедените докази, истиот начин на работа бил применет при најмалку пет транспорти. Кај товарните возила, откако стоката била царинета и возилата пломбирани, пломбата била отстранувана, а дел од пријавената стока бил ваден и заменуван со кутии со марихуана со приближно иста тежина.

Дрогата потоа била транспортирана кон граничниот премин Табановце, прикриена како прехранбени производи, перници и јоргани. Товарните возила, според обвинителството, биле следени од осомничени со патнички возила.

На 21 јули 2026 година, српското Јавно обвинителство за организиран криминал поднело обвинителен акт против шест членови на групата за меѓународен недозволен транспорт на марихуана.

Во меѓувреме, во постапката што се води во Македонија, на 10 август, Основниот кривичен суд Скопје донел две пресуди врз основа на предлог-спогодби со двајца осомничени. Тие го признале делото и добиле затворски казни од три години и шест месеци, односно три години и осум месеци.