Италија сака да воведе казни за пешаци кои користат мобилен телефон додека преминуваат улица

Пешаците во Италија кои ќе користат мобилен телефон додека ја преминуваат улицата наскоро би можеле да бидат казнети со 75 евра. Мерката е дел од предлог-измените на Законот за безбедност во сообраќајот, со кои италијанското Министерство за транспорт сака да ја зголеми безбедноста и да го намали бројот на сообраќајни незгоди.

Предлог-законот, чие усвојување се очекува до средината на октомври, предвидува казни за пешаци кои користат мобилни телефони додека ја преминуваат улицата. Забраната би важела и за употреба на други електронски уреди, како лаптопи, таблети и дигитални фотоапарати.

— реклама —

Мерката следува по повеќе судски случаи во кои одговорноста за сообраќајни незгоди била припишана на невнимателни пешаци.

— реклама —

Сепак, предлогот предвидува и исклучоци. Мобилен телефон ќе може да се користи во итни случаи, како и за разговор преку уред без користење раце. Дозволено ќе биде и носење слушалки, но само доколку не го попречуваат слухот на двете уши. Забраната ќе се однесува само на преминување на улица, а не и на движење по тротоар.

Според предлогот, пешаците пред да ја преминат улицата ќе треба да проверат дали возачот ги забележал и дали има намера да запре. Од нив ќе се бара и да не се задржуваат непотребно при преминувањето.

— реклама —

Слични казни за пешаци кои користат телефони при преминување улица веќе има во Литванија, додека Хонолулу во 2017 година стана првиот град во светот што воведе ваков пропис. Слична мерка во 2020 година воведе и јапонскиот град Јамато.

— реклама —

Предлог-законот предвидува и значително повисоки казни за возачи кои користат мобилен телефон додека управуваат возило. За повторен прекршок казната би можела да достигне 2.588 евра, а предвидено е и одземање на возачката дозвола во период од еден до три месеци.

Од друга страна, предлогот за ограничување на возењето за лица постари од 85 години нема да биде дел од новиот закон. Со првичниот предлог се разгледуваше можноста на овие возачи да им биде дозволено да возат само во радиус од 100 километри од домот и да им биде забрането користење автопати, но италијанското Министерство за транспорт потврди дека мерката е отфрлена.