Италијанскиот бизнисмен Валтер Лавитола признал дека го организирал бомбашкиот напад врз домот на познатиот истражувачки новинар Сигфридо Ранучи, но неговиот адвокат тврди дека целта не била да му наштети на новинарот, туку да му обезбеди посилна полициска заштита.
Лавитола го дал признанието пред истражителите по апсењето на почетокот на неделата. Според неговиот адвокат Серџо Кола, бизнисменот го организирал нападот затоа што Ранучи бил под смртни закани од мафијата и сакал властите да ја зголемат неговата безбедност.
Нападот се случил во октомври минатата година пред домот на Ранучи во близина на Рим. Моќна импровизирана експлозивна направа била активирана пред куќата, при што речиси целосно биле уништени автомобилот на новинарот и возилото на неговата ќерка. Првично се сомневало дека зад нападот стои мафијата.
Кон крајот на јуни биле уапсени уште четири лица, осомничени дека го извршиле нападот по наводна наредба на Лавитола. Тој бил близок пријател со Ранучи, водител на истражувачката емисија „Репорт“ на италијанската државна телевизија РАИ.
Лавитола ги отфрлил тврдењата дека нападот бил организиран со цел да се зголеми популарноста на Ранучи и да му се отвори пат кон политиката. Во истражниот материјал, сепак, се наоѓаат транскрипти од телефонски разговори во кои Лавитола наводно му вели на новинарот: „За две години ќе бидеш премиер“.
Истражителите не наведуваат дека Ранучи знаел за планот, а самиот новинар претходно изразил шок поради апсењето на својот пријател.
Ранучи е познат по истражувањата за криминалот и корупцијата, вклучително и теми поврзани со италијански политичари. Тој во моментов води и судски постапки за клевета против коментатори и политичари кои го обвиниле дека самиот го инсценирал нападот за лична корист.
Неговиот адвокат Роберто Де Вита оцени дека Ранучи, доколку се потврдат тврдењата за мотивот на Лавитола, е „тројна жртва“ – на самиот напад, на предавството од пријателот и на медиумскиот и политичкиот притисок што следувал.
Случајот дополнително ја отвори дебатата за безбедноста на новинарите и слободата на медиумите во Италија. Ранучи претходно јавно зборувал и за притисоците врз италијанската државна телевизија РАИ и мешањето на владата на Џорџа Мелони во нејзината работа.
