Ива Михаилова е веќе во Бугарија, објави бугарски политичар - нема инфо од македонските институции

Ива Михаилова од Кочани, која е обвинета во судска постапка за сообраќајна несреќа со смртни последици, веќе се наоѓа во Бугарија, објави Ангел Георгиев, претставник на бугарската партија „Преродба“.

Георгиев преку социјалните мрежи соопшти дека успеале да се изборат за нејзиното враќање во Бугарија, по повеќемесечните барања таа да добие можност за лекување таму.

— реклама —

„Ива Михаилова веќе е во Бугарија! Успешно се изборивме за нејзиното враќање! Време беше институциите да си ја завршат работата, откако ги пропуштија првите седум месеци“, напиша Георгиев.

Тој порача дека ќе продолжат да се борат за секој Бугарин, без разлика во кој дел од светот се наоѓа.

— реклама —

Објавата доаѓа само неколку дена по средбата во Софија меѓу македонскиот министер за надворешни работи Тимчо Муцунски и бугарската министерка Велислава Петрова-Чамова, на која беше отворено и прашањето за Михаилова.

— реклама —

Бугарската страна тогаш побара случајот да се разгледува и од хуманитарен аспект, поради тврдењата за нејзината здравствена состојба. Муцунски посочи дека судската постапка мора да биде одвоена од правото на здравствена заштита и дека извршната власт не може да интервенира во судските одлуки.

По средбата беше соопштено дека постои подготвеност бугарски лекари да дојдат во Македонија и да ја прегледаат Михаилова.

— реклама —

Засега нема официјално соопштение од македонските судски органи за околностите под кои Михаилова наводно заминала во Бугарија, дали е донесена судска одлука со која ѝ е дозволено патувањето и како тоа се одразува врз постапката што се води против неа.

Информацијата за нејзиното пристигнување во Бугарија засега се темели на јавната објава на Георгиев.