Ива Михаилова има активна судска забрана, ниту Македонија ниту Бугарија имаат евиденција дека ја преминала границата

Ива Михаилова, за која е во сила активна судска забрана, нема евидентиран излез од Македонија, ниту легален влез во Бугарија. Ова го соопшти портпаролот на Министерството за внатрешни работи, Гоце Андреевски, откако Михаилова се појави во Бугарија и даде изјави за тамошните медиуми, а нејзиниот адвокат тврдеше дека ја преминале границата преку официјален граничен премин.

„Министерството за внатрешни работи изврши проверки во системот за гранична контрола, при што е утврдено дека за лицето Ива Михаилова, за кое е во сила активна судска забрана, нема евидентиран излез од територијата на Македонија“, изјави Андреевски.

Проверките не завршиле само во македонските институции. Преку Заедничкиот контакт-центар со Република Бугарија, МВР побарало информации и од бугарската гранична полиција, која исто така не пронашла податоци за легален влез на Михаилова.

— реклама —

„Дополнително, преку Заедничкиот контакт-центар со Република Бугарија, извршени се проверки и од страна на бугарската гранична полиција, од каде што е добиена информација дека за наведеното лице нема евидентиран легален влез на територијата на Република Бугарија“, соопшти портпаролот.

Според официјалните податоци од граничните евиденции, последното регистрирано патување на Михаилова во Бугарија било пред една година.

„Според податоците од граничните евиденции, лицето последен пат остварило влез во Република Бугарија во септември 2025 година, додека во октомври 2025 година е евидентиран негов излез од Република Бугарија, односно влез во Македонија“, изјави Андреевски.

— реклама —

Овие информации се спротивни на изјавата на адвокатот на Михаилова за бугарската телевизија НОВА, во која тврдеше дека заедно ја преминале границата со документи и без никакви пречки.

„Преку граничен премин поминавме. Ги извадивме документите и поминавме. Луѓето од македонска страна добро знаеја дека е Ива Михаилова. Никој ништо не кажа. Разговаравме и тргнавме“, изјави адвокатот.

Михаилова, пак, во интервјуто за НОВА не кажа кога планира да се врати во Македонија.

— реклама —

„Не можам да кажам колку ќе останам во Бугарија“, рече таа, а на прашањето дали планира да се врати одговори: „Тоа ќе го процениме понатаму“.

Нејзиниот адвокат го поврза престојот во Бугарија со потребата од медицински третман, но и со нејзиното чувство на безбедност, тврдејќи дека ќе остане таму додека лекарите сметаат дека е потребно и додека не се чувствува сигурна дека нема да биде малтретирана поради нејзиното бугарско национално изјаснување.

Претходно, „Скопје1“ побара одговори и од претседателот на Основниот суд Кочани, Спиро Борисов, за тоа дали Михаилова има активни мерки за обезбедување присуство, кои се тие мерки и дали судот располага со информации за нејзиното заминување од Македонија. Борисов не одговори на поставените прашања.

Со најновото соопштение на МВР првпат официјално се потврдува дека за Михаилова постои активна судска забрана, но не се прецизира за каква забрана станува збор.

Истовремено, податоците од македонската и бугарската гранична полиција покажуваат дека во нивните евиденции нема регистрирано нејзино неодамнешно легално преминување на границата.

Засега останува неразјаснето како Михаилова стигнала во Бугарија, дали постои пропуст во граничните евиденции или станува збор за преминување надвор од законската процедура. Самото отсуство на евидентиран премин не е доволен доказ за утврдување на начинот на кој ја напуштила Македонија.