Во текот на изминатото деноноќие во земјава се регистрирани 31 пожар на отворен простор, од кои еден и натаму е активен, три се под контрола, а 27 се изгаснати, информира Центарот за управување со кризи.
Активниот пожар е регистриран на територијата на Општина Ѓорче Петров, во близина на селото Грачани, но во моментов огнот е активен на територијата на Република Косово, каде што зафатил шумски простор.
Под контрола се пожарите во селото Копаница во Општина Сарај, каде што гореле нискостеблеста шума и ниска вегетација, во селото Брест, на местото Рамно на Скопска Црна Гора, каде што бил зафатен мешан шумски појас, како и пожарот меѓу селата Буринец и Локов во Струга, каде што горела нискостеблеста шума.
Во текот на денот биле изгаснати уште 27 пожари. Меѓу локациите каде што интервенирале надлежните е и Градскиот парк во Скопје, каде што гореле ниска вегетација и дрвја, како и повеќе локации во Скопје, Бутел, Шуто Оризари, Прилеп, Охрид, Струга, Велес, Липково, Ранковце, Брвеница, Желино, Маврово и Ростуше, Битола, Струмица, Градско, Гостивар и Куманово.
Дел од пожарите биле регистрирани на депонии и места со отпад, додека на други локации биле зафатени сува трева, стрништа, ниска вегетација и шумски површини.
Според ЦУК, информацијата се однесува на состојбата заклучно со 07:30 часот на 4 септември 2026 година.
