Изгоре куќа во Пробиштипско, четири големи пожари во Штипско – Ангелов апелира на максимална претпазливост

Во текот на вчерашниот ден на подрачјето на Штип и Штипско биле регистрирани четири поголеми пожари на отворен простор, додека голем пожар избувнал и во Општина Пробиштип, кој подоцна се проширил кон Општина Чешиново-Облешево, информира директорот на Дирекцијата за заштита и спасување, Стојанче Ангелов.

— реклама —

Тој посочи дека силниот ветер, карактеристичен за овој регион, значително го отежнал гаснењето на пожарите.

Според Ангелов, градоначалниците на Штип и Пробиштип успешно ги координирале локалните ресурси, а во гаснењето, покрај пожарникарите, биле вклучени и вработени од комуналните служби и друга механизација.

— реклама —

Поради тешко пристапниот терен на штипскиот Исар, во интервенцијата бил ангажиран и трактор, додека три трактори учествувале во гаснењето на пожарот во Пробиштипско.

— реклама —

„За жал, една куќа во пробиштипско село целосно изгоре. Разговарав со градоначалникот и сопствениците ќе добијат помош и обесштетување од општината и од Владата“, изјави Ангелов.

Тој нагласи дека причините за пожарите сè уште се утврдуваат. За пожарот на Исарот постојат индиции дека можеби настанал при чистење двор или поради допирање на електрични жици, но конечните причини ќе ги утврдат надлежните служби.

Ангелов упати силен апел до граѓаните да не палат оган на отворен простор во текот на летните месеци, без разлика дали станува збор за чистење дворови, палење стрништа, пасишта или подготовка на скара, бидејќи и најмала невнимателност може да предизвика пожар со сериозни последици.