Излезноста во Србија до 18 часот достигна 64,89 отсто

До 18 часот на вонредните парламентарни избори во Србија гласале 64,89 отсто од запишаните избирачи, соопшти Републичката изборна комисија (РИК). Излезноста е за речиси 13 процентни поени повисока во споредба со парламентарните избори од 17 декември 2023 година, кога до истиот период гласале 51,93 отсто од избирачите. Податоците се однесуваат на територијата на Србија без Косово.

— реклама —

Според регионалните податоци, најголема излезност е забележана во Војводина, каде што гласале 66,90 отсто од избирачите. Во Белград излезноста изнесувала 65,67 отсто, во Шумадија и западна Србија 64,53 отсто, а во јужна и источна Србија 62,01 отсто.

Избирачките места се затвораат во 20 часот, но право на глас имаат и сите граѓани што во тој момент ќе бидат затекнати во ред пред избирачкото место.

— реклама —

За време на прес-конференцијата, новинарката на Н1, Ивана Момчиловиќ Одобашиќ, укажала на бројните инциденти во текот на изборниот ден. Таа ги споменала судирите во Лазаревац, нападот врз мотоциклистите што ги поддржуваат студентите во Ниш, инцидентите во Дољевац и Панчево, како и физичките напади врз новинари. Се повикала и на податоците на набљудувачката организација ЦРТА, според кои биле забележани околу 260 нерегуларности.

— реклама —

Претседателот на РИК, Владимир Димитријевиќ, потврдил дека во текот на денот имало различни инциденти, но нагласил дека повеќето се случиле надвор од избирачките места. За таквите случаи, како што објаснил, надлежни се Министерството за внатрешни работи и обвинителствата, кои постапуваат согласно со законот.

Димитријевиќ додал дека имало несогласувања меѓу членовите на избирачките одбори, особено при отворањето на избирачките места, но дека напнатоста во меѓувреме се намалила. Според него, на најголемиот дел од избирачките места гласањето се одвива редовно, со помали нерегуларности што одборите успешно ги решаваат.

Тој посочил и дека граѓаните кои сметаат дека им е повредено избирачкото право, на пример ако не им било овозможено да гласаат, можат да поднесат соодветни правни средства. Димитријевиќ изразил очекување изборниот ден успешно да заврши на сите избирачки места.