Израел во последните години значително ги зајакнал односите со Србија, а соработката дополнително се интензивирала за време на војната на Блискиот Исток, пишува „Џерусалем пост“.
Според весникот, во период кога Израел се соочува со критики од дел од европските држави поради војната во Газа, Белград се наметнал како еден од неговите најважни партнери во Европа, особено во областа на одбраната и безбедноста.
Во текстот се наведува дека Србија веднаш по нападот на Хамас врз Израел во октомври 2023 година испратила муниција, а испораките продолжиле и по почетокот на израелската копнена офанзива во Газа. До средината на 2024 година, Србија извезла муниција во вредност од 16,3 милиони евра, додека во 2025 година извозот достигнал 114 милиони евра.
Весникот потсетува и дека израелскиот премиер Бенјамин Нетанјаху јавно му се заблагодарил на српскиот претседател Александар Вучиќ за, како што рекол, „непоколебливата поддршка“ на Србија.
Како дел од продлабочувањето на соработката, Србија потпишала договор вреден 1,6 милијарди долари со израелската компанија „Елбит системс“, кој опфаќа производство на извидувачки и борбени дронови, развој на прецизно оружје и системи за електронско војување. Двете земји во текот на 2026 година потпишале и договор за полесна размена на разузнавачки и одбранбени информации.
„Џерусалем пост“ оценува дека за Србија оваа соработка има и пошироко геополитичко значење, бидејќи ѝ овозможува да ја намали зависноста од традиционалните партнери, како Русија и Кина, додека Израел преку Белград настојува да ја диверзифицира својата мрежа на сојузници и добавувачи на воена опрема.
