Односите меѓу американскиот претседател Доналд Трамп и израелскиот премиер Бенјамин Нетанјаху сè повеќе се влошуваат, а истовремено расте и незадоволството на израелската јавност од американската политика на Блискиот Исток, оценува израелскиот весник „Хаарец“.
Според анализата, Нетанјаху сакал повторно да се сретне со Трамп, меѓу другото и за да покаже пред израелските гласачи дека и натаму има силно влијание во Вашингтон. Сепак, најавената средба не се одржала, а темата брзо била засенета од новите кризи во регионот.
Весникот наведува дека Трамп до неодамна уживал исклучително висока доверба во Израел. Голем дел од јавноста му припишувал заслуги за ослободувањето на израелските заложници и го сметал за клучен сојузник на земјата.
Но, расположението се променило по примирјето со Иран и прекинот на огнот во Либан, потези што многу Израелци ги доживеале како неповолни за нивната безбедност. Според анкетите, процентот на Израелци кои сметаат дека безбедноста на Израел му е приоритет на Трамп паднал од 60 на 28 проценти за само неколку месеци.
„Хаарец“ пишува дека Нетанјаху е ставен во незавидна позиција. Од една страна, дел од десничарските гласачи го сметаат за премногу воздржан, а од друга страна, неговата блискост со Трамп повеќе не носи политички поени како порано.
Во анализата се посочува и дека проблемот е поширок од односот меѓу двајцата лидери. Поддршката за Израел во САД слабее, а последните истражувања покажуваат раст на негативните ставови кон Израел кај американската јавност.
„Хаарец“ заклучува дека Израел станува сè поизолиран на меѓународната сцена и дека традиционалното уверување дека американската поддршка е безусловна повеќе не е сигурно.
