Поранешниот градоначалник на Карпош и претседателот на ГРОМ, Стевчо Јакимовски, реагираше по отворањето на детскиот базен кај спортската сала „Наум Наумовски-Борче“ во населбата Карпош, обвинувајќи дека актуелните власти се претставуваат со проект кој, според него, бил завршен уште пред повеќе од една и пол година.
Во објава на социјалните мрежи, Јакимовски посочи дека нема ништо спорно во отворањето на базенот, но дека проблемот е во тоа што, како што тврди, проектот долго време не бил пуштан во употреба.
„Овој базен е речиси година и пол готов, но не го пуштаа во употреба најпрвин додека јас бев градоначалник, а потоа и во изминатите месеци, за да се создаде впечаток дека е направен во краток рок“, напиша Јакимовски.
Тој тврди дека надлежните одбивале да се сретнат со изведувачот и официјално да го преземат објектот, со што, според него, било одложено неговото отворање.
„Ако тоа го направеа минатата година, јасно ќе беше дека тие не го направиле. Значи, се китат со туѓи перја“, наведува Јакимовски.
На крајот од својата реакција, тој упати и критика кон актуелните власти, оценувајќи дека заслугите за проектот им се припишуваат на луѓе кои не учествувале во неговата реализација.
