Јане Ченто објави на социјалните мрежи дека повторно се сретнал со претседателката Гордана Сиљановска-Давкова, оценувајќи дека секоја средба со неа претставува дополнителен поттик во неговата, како што вели, борба за правда и вистина.
Тој истакна дека ја цени не само поради функцијата што ја извршува, туку и поради нејзината посветеност на принципите, владеењето на правото и правдата.
Според Ченто, за време на разговорот биле отворени повеќе актуелни теми, а посебен акцент бил ставен токму на правдата како темел без кој не може да постои вистинска држава ниту доверба кај граѓаните.
„Се согласивме дека борбата за правда мора да продолжи, дека вистината секогаш треба да биде кажана и дека никој не смее да биде заборавен или лишен од можноста да ја докаже својата вистина“, напиша Ченто.
Тој порача дека, иако правдата понекогаш доаѓа бавно, таа не смее да биде недостижна.
„Остануваме доследни на принципите, на фактите и на убедувањето дека вистината на крајот ќе победи. Борбата за правда продолжува. Нема откажување. Нема заборавање. Само истрајност, достоинство и верба во вистината“, порача Ченто.
На крајот тој ја заврши својата објава со пораката: „Да живее Република Македонија“.
